ەلوردادا 12 كۇندە سالىنعان قالالىق جۇقپالى اۋرۋلار ورتالىعى اشىلدى
«بۇل ورتالىق ينفەكسيانى باقىلاۋ ستاندارتتارىنا ساي كەلەدى. ەڭ باستىسى - بۇل جەردەگى پالاتالاردىڭ ىشىندەگى اۋا ەشقاشان ءدالىز جاققا شىعىپ كەتپەيدى. بۇل دەگەنىمىز - مەديتسينالىق قىزمەتشىلەر اۋرۋدىڭ الدىن الا الادى دەگەندى بىلدىرەدى. ەكىنشىدەن، بۇل ورتالىق ەكى بولىككە بولىنگەن. ءبىرىنشى بولىكتە اۋرۋ جۇقتىرعان ناۋقاستار جاتسا، ەكىنشى بولىكتە تەك قانا دارىگەرلەر جۇرەدى. بۇل دا مەديتسينالىق قىزمەتشىنىڭ اۋىرىپ قالۋىنان ساقتايدى دەۋگە بولادى. بۇل جەردە از ورىندىق پالاتالار بار، سونداي- اق ورتالىق قالا سىرتىندا ورنالاسقان»، - دەيدى قالالىق جۇقپالى اۋرۋلار ورتالىعىنىڭ ديرەكتورى اننا سەپكە.
ازىرگە بۇل جەردە كوروناۆيرۋسپەن اۋىرعاندار ەمدەلەدى. «بولاشاقتا جۇقپالى اۋرۋعا شالدىققان كەز كەلگەن ادام وسى جەردە ەمدەلە الاتىن بولادى. بۇل جەردە بارلىق دياگونوستيكالىق، زەرتحانالىق قۇرىلعىلارمەن جابدىقتالعان، سوندىقتان وسى جەردە دياگنوستيكا جاساۋعا دا، ەمدەۋگە دە بولادى. بۇل جەردە 362 مەديتسينالىق قىزمەتشى جۇمىس ىستەيتىن بولادى. بۇل جەردەگى مەديتسينالىق قىزمەتشىلەر - نۇر- سۇلتان قالاسى جانە رەسپۋبليكالىق ۇيىمداردىڭ ماماندارى. كوروناۆيرۋسپەن كۇرەستە جۇقپالى اۋرۋلارمەن اينالىساتىن دارىگەرلەر عانا ەمەس، بارلىق سالاداعى دارىگەرلەر كۇش بىرىكتىردى. كەلەسى اپتادان باستاپ كوروناۆيرۋس جۇقتىرعان ناۋقاستاردى قابىلداي باستايمىز»، - دەيدى ول.
ول بۇل ورتالىقتاعى نەگىزگى ءبولىم - جانساقتاۋ ءبولىمى ەكەنىن ايتتى. «وسى ورتالىقتا 20 ورىندىق جانساقتاۋ ءبولىمى بار. ودان بولەك جۇقپالى اۋرۋلارعا ارنالعان بەس ءبولىم بار. بۇل جەردەگى 200 توسەك- ورىندىڭ 100-ىندە جاساندى تىنىس الدىرۋ قۇرىلعىسى بار. بىزدەگى قابىلداۋ بولىمىندە قابىلداۋ بوكستارى بار. بۇل جەردە ناۋقاسقا جەدەل مەديتسينالىق قىزمەت كورسەتىلەدى. جانساقتاۋ بولىمىندە 20 توسەك- ورىن جانە وسىنشا جاساندى تىنىس الۋ قۇرىلعىسى، باسقا دا قاجەتتى مەديتسينالىق جابدىقتار بار.
بۇل جەردەگى دارىگەرلەر جۇمىس ىستەگەن جەرلەرىندە ۇيىقتاماي، قالانىڭ باسقا بولىگىنە بارىپ دەمالادى. قالا باسشىلىعىنا، ەلوردا اكىمىنە دارىگەرلەردىڭ Hilton قوناق ۇيىنە بارىپ دەمالۋلارىنا مۇمكىندىك بەرگەندەرى ءۇشىن العىس ايتامىز. ول جەردە مەديتسينالىق قىزمەتكەرلەرىنىڭ تىنىعىپ الۋىنا جاقسى جاعداي جاسالعان»، - دەيدى ول.
مۇنداي ورتالىق قازاقستاننىڭ ەشبىر ايماعىندا بۇرىن- سوڭدى بولماعان. الداعى ۋاقىتتا الماتى مەن شىمكەنت قالالارىندا سالىنادى. بۇل ورتالىقتى BI GROUP قۇرىلىس كومپانياسى سالدى.
«بۇل ورتالىق تەمىر بەتوندى مودۋلدى بلوكتاردان سالىندى. عيماراتتى 12,5 كۇن ىشىندە سالىپ بىتىردىك. ورتالىقتى سالۋ بارىسىندا 1000-عا جۋىق ادام تاۋلىك بويى تىنىمسىز جۇمىس ىستەدى. بۇل جەردە جوبالاۋشىلار دا، قۇرىلىسشىلار دا ۇلكەن ەڭبەك ەتتى. مەديتسينالىق قىزمەتشىلەر قۇرىلىس باستالعالى قاسىمىزدا بولىپ، قاي جەردە نە بولۋى كەرەك ەكەنى تۋرالى كەڭەس بەرىپ وتىردى، سەبەبى قۇرىلىس جۇمىسى مەملەكەتتىك ستاندارتقا ساي بولۋى كەرەك بولدى. ءبارى ولارمەن اقىلداسىپ ىستەلىندى»، - دەيدى جوبا جەتەكشىسى ايدان نارىمبايەۆ.
ول قۇرىلىس باستالعان كەزدە BI GROUP كومپانياسىنىڭ سەرىكتەستەرى شاقىرىلعانىن ايتتى.
«ءبارىمىز باس بىرىكتىرىپ، تاتۋ جۇمىس ىستەدىك. جۇمىس بارىسىندا وزگەرىستەر كوپ بولدى جانە جەدەل شەشىم قابىلداۋعا تۋرا كەلىپ وتىردى. ءبىراق قانداي ماسەلە بولسا دا شەشىمى بار. قۇرىلىس جۇمىسى قىسقا مەرزىمدە اياقتالعانىنا جانە جۇمىسشىلاردىڭ كوپ بولۋىنا بايلانىستى جوبانىڭ قۇنى وزگەرگەن جوق. مىسالى، وسى عيماراتتى ءۇش اي سالعاندا دا قۇرىلىسشىلار 12,5 كۇن ىشىندە سالۋ بارىسىندا قولداناتىن تاماقتى تۇتىنۋشى ەدى. سوندىقتان باعادا ايتارلىقتاي ايىرماشىلىق بولعان جوق. جوبانىڭ جالپى قۇنى - 5,5 ميلليارد تەڭگە. عيماراتتىڭ كەپىلدىك ۋاقىتى - 2 جىل. ال جالپى قۇرىلىسقا قولدانعان تەحنولوگيا ءبىزدىڭ ەسەپتەۋىمىز بويىنشا كەم دەگەندە 50 جىلعا جارامدى»، - دەيدى جوبا ديرەكتورى ارمان لەسبايەۆ.
اۆتور: زارينا قاھارمان
