شىمكەنتتە كاسىپكەرلەر 12 بالالى وتباسىعا پاتەر سىيلادى
قالانىڭ جومارت ازاماتتارى 12 بالالى وتباسىعا ءۇش بولمەلى پاتەر سىيلادى، دەپ حابارلايدى قازاقپارات ءتىلشىسى.
بۇعان دەيىن پاتەر جالداپ كۇنەلتىپ كەلگەن جانۇياعا جاڭا باسپانا كۇتپەگەن توسىنسىي بولدى.
ايتا كەتەيىك، مۇحتار بەردىقۇلوۆ پەن جۇبايى گۇلنارانىڭ 7 بالاسى بار. ولار 2014-جىلى جول اپاتىنان كوز جۇمعان تۋىستارىنىڭ 5 بالاسىن قامقورلىققا الدى. وتاعاسى - جەكە كومپانيادا كۇزەتشى بولىپ جۇمىس ىستەسە، كەلىنشەگى گۇلنار ءۇي شارۋاسىندا. ۇل-قىزدارى كوللەدجەر مەن مەكتەپتەردە ءبىلىم الادى.
ءۇش اي بۇرىن بۇل وتباسىنىڭ تۇرمىستىق جاعدايىنان حاباردار بولعان قالالىق كاسىپكەرلەر پالاتاسى وڭىرلىك كەڭەسىنىڭ مۇشەلەرى ولارعا باسپانا الىپ بەرۋگە قاراجات جيناي باستاعان. وسىلايشا «مەنىڭ اتامەكەنىم» قوعامدىق قورىنا 8,5 ميلليون تەڭگە جينالادى. قوماقتى قاراجاتقا ءۇش بولمەلى پاتەر ساتىپ الىنىپ، وندا جوندەۋ جۇمىستارىن جۇرگىزىلدى.
ال، «بال تەكستيل» كىلەم فابريكاسى وتباسىنا كىلەم سىيلادى. «ازالا تەكستيل» كومپانياسى توسەك-ورىن جابدىعىمەن قامتاماسىز ەتتى.
ىسكەر ايەلدەر كەڭەسىنىڭ مۇشەلەرى بالالار كيىمىن، تۇرمىستىق تەحنيكا مەن وتباسى ءۇشىن ىدىس-اياق ساتىپ الىپ بەردى.
پاتەر كىلتىن سالتاناتتى تاپسىرۋ كەزىندە كاسىپكەرلەر ىسكەر ازاماتتاردى قايىرىمدى بولۋعا شاقىردى.
«قازىر كاسىپكەرلەر قيىن كەزەڭدەردى باستان كەشىرىپ جاتىر. توتەنشە جاعداي مەن كارانتينگە بايلانىستى ولاردىڭ كوپشىلىگى جۇمىسىن توقتاتتى. ءبىراق ەڭ باستىسى، مۇنداي جاعدايدا دا كاسىپكەرلەر الەۋمەتتىك جاۋاپكەرشىلىكتى سەزىنىپ، الەۋمەتتىك ءالسىز وتباسىلارعا قامقور بولۋى كەرەك. جالپى، پاندەميا باستالعالى بەرى وڭىرلىك كەڭەستىڭ مۇشەلەرى شىمكەنتتىكتەرگە 100 ميلليون تەڭگە كولەمىندە كومەك كورسەتتى. مۇقتاج جاندارعا اقشالاي قولعابىس ەتىپ، ەمدەۋ ورىندارىنا ەپيدەمياعا قارسى پرەپاراتتار مەن مەديتسينالىق قورعانىس كيىمدەرىن جەتكىزىپ بەردى. بەتپەردە مەن ازىق-تۇلىك ونىمدەرىمەن كومەك بەردى»، - دەپ اتاپ ءوتتى شىمكەنت قالاسى كاسىپكەرلەر پالاتاسى ديرەكتورىنىڭ ورىنباسارى ولجاس جانسەيىتوۆ.
