ەلوردادا 12 ءىرى ساۋدا- ويىن- ساۋىق ورتالىقتارى جۇمىسىن ۋاقىتشا توقتاتتى
«قالانىڭ ساۋدا ويىن- ساۋىق ورتالىقتارىندا ازىق- تۇلىك دۇكەندەرى، ماشينا جۋاتىن جەرلەر مەن ءدارىحانالار عانا جۇمىس ىستەيدى. قالعان ساۋدا نۇكتەلەرىنىڭ ءبارى ۋاقىتشا جۇمىسىن توقتاتادى. قالاداعى 12 ءىرى ساۋدا- ويىن- ساۋىق ورتالىقتارى قازىر ۋاقىتشا جۇمىسىن توقتاتۋ تۋرالى شەشىم قابىلدادى. مىسالعا، Mega Silk Way-دە جالعا بەرىپ جاتقان ورىندارىن قازىرشە جالعا بەرۋ قۇنىن الۋىن توقتاتتى جانە قىزمەتكەرلەرىنىڭ جالاقىسىنىڭ 75 پايىزىن تولەۋدى قولداپ وتىر. ءبىز وزگە دە ءىرى ورتالىقتاردىڭ باسشىلارىمەن وسى باعىتتا جۇمىس ىستەپ جاتىرمىز» ، - دەيدى التاي كولگىنوۆ.
سونىمەن بىرگە، ونىڭ ايتۋىنشا، حالىققا قىزمەت كورسەتۋ ورتالىقتارىنىڭ جۇمىسى ۋاقىتشا شەكتەلەدى. قازىرگى ۋاقىتتا شۇعىل ماسەلە بولماسا اتالعان ورتالىقتارعا بارۋدىڭ قاجەتى جوق. «پرەزيدەنت تاراپىنان بارلىق ۇيىم باسشىلارىنا قىزمەتكەرلەردىڭ 70 پايىزىن قاشىقتىقتان جۇمىس جاساۋعا نەمەسە ەڭبەك دەمالىسىنا شىعارۋعا ۇسىنىس جاسالدى. وسىنى ساقتاۋدى سۇرايمىز. بۇل كوممۋنالدىق قىزمەتكەرلەرگە، قۇقىق قورعاۋ، ارنايى ورگاندارعا، مەديتسينا قىزمەتكەرلەرىنە جانە قالانىڭ تىنىس- تىرشىلىگىن قامتاماسىز ەتەتىن باسقا ۇيىمدارعا قاتىستى ەمەس» ، - دەدى ول.
قالا باسشىسىنىڭ ايتۋىنشا، ساۋدا ويىن- ساۋىق ورتالىقتارىندا، بازارلار جانە كوممۋنالدىق شارۋاشىلىق، تاماق ونەركاسىبى، قوعامدىق تاماقتانۋ جەرلەرىندە، حالىققا قىزمەت كورسەتۋ ورتالىعىندا، ۆوكزال مەن اۋەجايدا، قوناق ۇيلەردە جانە باسقا دا ورىنداردا سانيتارلىق زالالسىزداندىرۋ رەجىمى كۇشەيتىلدى.
«مەديتسينالىق تەكسەرۋدەن وتۋگە جانە ەمدەلۋدەن باس تارتقان، كارانتين رەجىمىن ساقتاۋعا بەي- جاي قاراپ، ەپيدەميولوگيالىق جاعدايدى جانە باسقا دا جاعدايلاردى انىقتاۋ ءۇشىن قولدا بار مالىمەتتى جاسىرعان ادامدارعا باقىلاۋ كۇشەيتىلەدى. ولارعا جاۋاپكەرشىلىك بار ەكەندىگىن ۇمىتپاۋعا شاقىرامىز» ، - دەدى ول. قوعامدىق ءتارتىپتى ساقتاۋ ءۇشىن قالا اۋماعىندا پاترۋلدىك باقىلاۋ كۇشەيتىلەدى.
