كينو ءتۇسىرۋ الاڭىندا جۇمىس ىستەگەن 12 اۋدارماشى امەريكالىقتارمەن ەرىپ كەتىپ قالدى - گۇلنار سارسەنوۆا

بۇل تۋرالى «ۇلتتىق كينونى قولداۋ ورتالىعى» كوممەرتسيالىق ەمەس اكسيونەرلىك قوعامىنىڭ قىزمەتىنە ارنالعان باسپا ءسوز كونفەرەنتسياسىندا ايتىلدى، دەپ حابارلايدى قازاقپارات ءتىلشىسى.

«ءبىز ءمان بەرەتىن بەسىنشى باعىت - ءبىلىم. كينەماتوگرافيا سالاسىندا جۇمىس ىستەيتىندەردىڭ بىلىكتىلىگىن ارتتىرۋ كەرەك. كينو - جوعارى تەحنولوگيانى قولداناتىن، قىمبات تۇراتىن پروتسەسس. فيلم تۇسىرۋگە اكتەرلەرلى قوسقاندا 100-200 ارالىعىندا ادام ەڭبەك ەتەدى. قازاقستاندىق فيلمدەردى دە ارنايى وقۋ ورنىندا ءبىلىم العان، ءوز ءىسىنىڭ مامانى ءتۇسىرۋى كەرەك»، - دەيدى «ۇلتتىق كينونى قولداۋ مەملەكەتتىك ورتالىعىنىڭ» باسقارما ءتورايىمى گۇلنار سارسەنوۆا.

ول ەگەر ءبىز باسقا دا مەملەكەتتەر ءۇشىن كينو الاڭى رەتىندە اشىق بولساق، اعىلشىن ءتىلىن مەڭگەرۋىمىز كەرەك ەكەنىن ايتتى.

«7-8 جىل بۇرىن ەلىمىزدە «ماركو پولو» فيلمى ءتۇسىرىلدى. قازاقستاندىق توپ 15 ادامنان تۇردى. كينو ءتۇسىرۋ الاڭىندا 12 اۋدارماشى بولدى. كەيىن سول 12 اۋدارماشى امەريكالىقتارمەن كەتىپ قالدى. ولار وسى سالانى جاقسى كورىپ قالعان جانە ءتىل بىلەتىندەرىن پايدالانىپ شەتەلدىكتەرمەن جۇمىس ىستەپ كورۋگە شەشىم قابىلداعان. ءبىزدىڭ ورتالىق اعىلشىن تىلىندە كينو ءتىلىن ۇيرەتەتىن كۋرس اشتى. ءبىزدىڭ اكتەرلەر دە اعىلشىن ءتىلىن مەڭگەرۋى كەرەك. اعىلشىن ءتىلىن بىلمەۋ - ولاردىڭ جولىن جابادى»، - دەيدى ول.

اۆتور: زارينا قاھارمان

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى