اتىراۋلىق وقۋشى كۋبيكتى 12 سەكۋند ىشىندە قۇراستىرىپ شىقتى
سەمەي، الماتى، شىمكەنت جانە اقتوبە وبلىستارىنان 60 تان استام دارىندى جاس رۋبيك بىرلىگىن ۋاقىتقا قۇرۋدان باق سىناستى، دەپ حابارلايدى قازاقپارات.
ءدۇبىرلى دودانىڭ ءادىل ءوتۋىن باقىلاۋعا ۋكراينادان تاۋەلسىز ساراپشىلار كەلگەن. ەكى كۇنگە سوزىلعان زياتكەرلىك دودادا جاڭا رەكوردتار مەن ەسىمدەر بەلگىلى بولدى. بايقاۋعا كەلگەندەر 2x2, 3x3، «مەگاميكس»، «پيراميدا» سىندى كاتەگوريالار بويىنشا باق سىنادى.
«بۇل مەنىڭ قازاقستانعا العاش رەت كەلۋىم. سىزدەردە رۋبيكتى قۇراستىرۋ قارقىندى دامىپ كەلەدى. وسىدان بەس، ون جىل بۇرىن فەدەراتسيا بولىمشەلەرى تەك استانا مەن الماتى قالالارىندا بولعان. ال قازىر ەلدىڭ بارلىق ايماقتارىندا KSF وكىلدەرى جۇمىس ىستەيدى. مەنىڭ بايقاعانىم، قازاقستاندا مىقتى سپيدكۋبەرلەر كوبەيىپ كەلەدى. ال اتىراۋداعى چەمپيوناتقا كەلەر بولساق، مۇنداعى قاتىسۋشىلاردىڭ 90 پايىزى جاس وسپىرىمدەر. بالالار ءۇشىن بۇل العاشقى تاجىريبە»، - دەيدى WCA قاۋىمداستىعىنىڭ ۋكرايناداعى وكىلى ستەپان دجۋريلو.
سايىستا ءازيز ولجاعالي، سامالبەك كەلىموۆ، ءامىرحان يسلاموۆتار الدىنا جان سالعان جوق. اسىرەسە اتىراۋلىق دوسىمجان جۇمابيدەنوۆ «كوزدى جابىق كۇيدە جيناۋ» كاتەگورياسىندا ءتۇرلى ءتۇستى تەكشەنى 60 قاتىسۋشىنىڭ اراسىندا ءبىر ءوزى دۇرىس ورىنداپ شىقتى. ال جارىستىڭ ەڭ كىشكەنتاي قاتىسۋشىسى دياس قاراعۇل بولدى. ول قالاداعى 34№ مەكتەپ گيمنازياسىندا ءبىلىم الادى.
