سال اۋرۋىنا شالدىققان 12 جاسار قىز «بالاپان» ارناسىنىڭ جۇرگىزۋشىسى اتاندى - ۆيدەو

نازەركە بۇعان دەيىن «قارەكەت» باعدارلاماسىندا ءوز حيكاياسىن بايانداپ، ولەڭ وقىپ، بۇكىل ەلدى جىلاتقان ەدى.

نازەركەنىڭ تاعدىرى بارشا قازاقستاندىقتاردى الاڭداتتى. 5 جاسىندا كەنەتتەن سال اۋرۋىنا شالدىققان ونىڭ وقيعاسى ەشكىمدى بەي-جاي قالدىرمادى. بۇل ورايدا «بالاپان» تەلەارناسىنىڭ باسشىسى ماقپال جۇماباي ونى تەلەجۇرگىزۋشىلىككە شاقىرعان. وعان بۇل ۇسىنىستى جۋرناليست ءاليا قۇدايبەرگەنوۆا تاستاپتى.

«بۇل نازەركە! «قارەكەتتىڭ» «نازەركەنىڭ ارمانى» دەگەن حابارىنا قاتىسقان كىشكەنتاي كەيىپكەر. ارباعا تاڭىلعان اققۋداي قىزدىڭ وقىعان ولەڭى تىڭداعاندى جىلاتىپ، جۇرەكتەردى ەلجىرەتتى. اسان پەردەشوۆ اعاسى ءتىپتى ءان جازىپ جىبەرىپتى. قانشا ادام تىلەكتەس بولدى. «نازەكا، ينستا پاراقشاڭدا 300 ادام ەكەن، قازىرگە. ءبىزدىڭ حاباردان سوڭ ون مىڭعا جەتەدى» دەگەنمىن. سويتسەم 45000 ادامعا تولىپتى! بارلىعى نازەركەنىڭ اياعىنان ءجۇرىپ كەتۋىنە شىن جۇرەگىمەن تىلەكتەس!

ويلانىپ وتىرىپ، ماقپال جۇماباي اتتى تالانتتى سىڭىلىمە حات جازدىم. ماقپال بەلگىلى اقىن. قازىر «بالاپان» ارناسىنىڭ باسشىسى. «نازەركەدەن جۇرگىزۋشى شىعارۋعا بولاتىن سياقتى. ومىرىنە تيتتەي بولسا دا وڭ وزگەرىس بولسىن، وسىنداي قۋانىش سىيلاي الاسىڭ با، ماقپۋش؟» دەگەن مازمۇنداعى حاتىما «جاقسى، ءاليا اپاي. ءنومىرىن بەرىڭىز» دەدى. اينالىپ كەتەيىن، ماقپال! ءبىراۋىز ءسوزىمدى جەردە قالدىرماي، نازەركەنىڭ بويىنداعى تالانتتى، كوزىندەگى وتتى بايقاپ جۇرگىزۋشىلىككە شاقىرعانىڭا مىڭ العىس! سەن دەگەن قاتارىنان وزا تۋعان سۇڭعىلا قىزسىڭ عوي.

اللا قالاسا نازەركە «بالاپاننىڭ» جۇرگىزۋشىسى. تەلەجۇلدىز بولادى! سوسىن جۋرناليست بولادى! نازەركەمەن بۇگىن سويلەستىم. قۋانىپ وتىر. جانىم، جارقىراپ جۇرسەڭ ەكەن»، - دەپ ءبولىستى قۇدايبەرگەنوۆا جەلىدەگى پاراقشاسىندا.

بۇل تۋرالى Stan.kz اقپاراتتىق اگەنتتىگى حابارلايدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى