شىمكەنتتە 12 ادامدى پويىز قاقتى: اكىمدىك قاۋىپسىزدىك ەرەجەلەرىن تۇسىندىرۋگە كىرىستى
ال بيىلعى جىل باسىنان تەمىرجول كولىگى 3 ادامدى قاعىپ كەتكەن، دەپ حابارلايدى قازاقپارات ءتىلشىسى.
ءمالىم ەتىلگەندەي، مەرت بولعاندار اراسىندا 2 جانە 4 جاسار بالالار بار. وسىنداي قايعىلى جاعدايلاردىڭ الدىن الۋ ءۇشىن بۇگىن قالالىق اكىمدىك تەمىرجول بويىنداعى ەلدى مەكەندەر تۇرعىندارىنا ءتۇسىندىرۋ جۇمىستارىن جۇرگىزدى. اتاپ ايتقاندا، اكىمدىك قىزمەتكەرلەرى قىزىلجار، يگىلىك، جاڭاتالاپ، تاۋەلسىزدىككە 20 جىل جانە كوكبۇلاق تۇرعىن الاپتارىنىڭ، ورنەك كوشەسىنىڭ تۇرعىندارىمەن كەزدەستى.
ايتا كەتۋ كەرەك، وسى اۋماقتارداعى تۇرعىنداردىڭ نەگىزگى كۇنكورىس كوزى - مال شارۋاشىلىعى. تەمىرجولعا جاقىن جەردەن مال ءجيى وتەتىندىكتەن، 2014 -جىلى ءۇي جانۋارلارىنىڭ جولعا شىعىپ كەتۋىنىڭ الدىن الۋ ماقساتىندا قورشاۋ قويىلعان. دەگەنمەن، تۇرعىندار قورشاۋدىڭ سىمىن قيىپ، مالدى تەمىرجول بويىنا جاقىن جەردە جايۋدى جانە بەلگىلەنبەگەن جەرلەردەن ايداپ ءوتۋدى ازايتار ەمەس. بۇعان قوسا، ءۇي جانۋارلارىن تەمىرجول بەكەتى ماڭىندا قاراۋسىز قالدىرىپ كەتۋ وقيعالارى دا تىيىلماي وتىر.
ماماندار كەزدەسۋ بارىسىندا تەمىرجول اۋماعىندا ءجۇرىپ-تۇرۋدىڭ قاۋىپسىزدىك ەرەجەلەرىمەن تانىستىردى. سونداي-اق، تەمىرجول ماڭىنداعى ورمان القاپتارىندا ءورت قاۋىپسىزدىگى مەن تازالىقتى ساقتاۋ قاجەتتىگى دە ەسكەرتىلدى.
