قىتايدا 12 جىل بۇرىن مۇزداتىلعان ۇرىقتان دەنى ساۋ بالا دۇنيەگە كەلدى
جەرگىلىكتى دارىگەرلەردىڭ بۇل جەتىستىگىن بۇكىل ەل بولىپ، سەنساتسياعا بالاپ جاتىر. ويتكەنى جاڭا تۋعان ءسابيدىڭ ەگىزى بيىل 5-سىنىپقا بارادى. وسىدان 12 جىل بۇرىن جاساندى جولمەن بالا ءسۇيۋدى جوسپارلاعان ەرلى-زايىپتىلار شياڭداعى كلينيكانىڭ كومەگىنە جۇگىنەدى.
سول كەزدە 12 ەمبريوننىڭ ەكەۋىن قۇرساعىنا سالىپ، 2004-جىلى ءبىر ءسابي سۇيەدى. ال قالعان 7 ۇرىقتى توڭازىتىپ قويعان.
بىلتىردان بەرى قىتاي ەكى بالا وسىرۋگە رۇقسات بەرگەن سوڭ جاسى كەلىپ قالسا دا، تاعى دا جۇكتى بولۋعا بەل بۋعان. ءسويتىپ، شەكەسى تورسىقتاي ۇل دۇنيەگە كەلدى. تۋعانىنا ءۇش-اق كۇن بولسا دا، دارىگەرلەر جاڭا تۋعان ءسابيدىڭ نەگىزگى جاسى 12 دە دەپ ازىلدەيدى.
«بالانىڭ سالماعى - 3 كەلى 440 گرام، بويى - 48 سانتيمەتر. دۇرىس دامىعان ءسابي دۇنيەگە كەلدى. ءبىز 12 جىل بۇرىن مۇزداتىلعان ەمبريوننان دەنى ساۋ بالا تۋاتىنىنا سەنىمدى بولعان جوق ەدىك»، - دەيدى «تاندۋ» اۋرۋحاناسى ديرەكتورىنىڭ ورىنباسارى جياڭ سيۋن.
