پروكۋرور س. احمەتوۆتى 12 جىل باس بوستاندىعىنان ايىرۋدى سۇرادى

ونىڭ توبىنىڭ قالعان مۇشەلەرى 3-تەن 8 جىلعا دەيىن باس بوستاندىعىنان ايىرىلۋى مۇمكىن. جالپى، س. احمەتوۆ پەن ونىڭ سىبايلاستارى تەمىر توردىڭ ارجاعىندا 70 جىلدان استام ۋاقىتتارىن وتكىزۋى مۇمكىن.

 ەستەرىڭىزگە سالا كەتەيىك، سەرىك احمەتوۆكە «لاۋازىمدى وكىلەتتىگىن اسىرا پايدالانۋ»، «كاسىپكەرلىك قىزمەتكە زاڭسىز ارالاسۋ»، 1 ميلليارد 100 ميلليون تەڭگە كولەمىندە «بيۋدجەت قارجىسىن جىمقىرۋ» جانە 2 ميلليون 440 مىڭ دوللار كولەمىندە «پارا الۋ» باپتارى بويىنشا 6 قىلمىس جاسادى دەپ ايىپتالۋدا.

جوعارىدا ايتىلعان ايىپتاۋلاردى ەسكەرە وتىرىپ، پروكۋرور سەرىك احمەتوۆكە مۇلكىن تاركىلەي وتىرىپ 12 جىلعا باس بوستاندىعىنان ايىرۋ جانە 5 جىل بويى جاۋاپتى مەملەكەتتىك قىزمەتپەن اينالىسۋعا شەكتەۋ قويۋ جازاسىن تاعايىنداۋدى سۇرادى. ال ايىپتاۋشى قاراعاندى وبلىسىنىڭ بۇرىنعى اكىمى باۋىرجان ابدىشيەۆكە 7 جىل، قاراعاندى قالاسىنىڭ بۇرىنعى اكىمى مەيرام سماعۇلوۆقا 4 جىل، قاراعاندى وبلىسى اكىمىنىڭ بۇرىنعى ورىنباسارى عابيت مۇحامبەتوۆكە 7 جىل، تۇرعىن ءۇي- كوممۋنالدىق شارۋاشىلىعى، جولاۋشىلار كولىگى جانە اۆتوموبيل جولدارى ءبولىمىنىڭ بۇرىنعى باستىعى مۇحتار ادامبەكوۆكە 3 جىل بەلگىلەۋدى سۇراپ وتىر. م. ادامبەكوۆتەن كەيىن اتالعان ءبولىمدى باسقارعان ايدوس جاكەنوۆكە جازا رەتىندە پروكۋرور شارتتى تۇردە 3 جىل بەرۋدى سۇرادى.

قالعان ايىپتالۋشىلار دا باس بوستاندىعىنان ايىرىلىپ، ءبىراز ۋاقىتتارىن تۇرمەدە وتكىزۋلەرى مۇمكىن.

 پروكۋرور قىلمىستىق جاۋاپكەرشىلىكتەن «قازاقستان ونەركاسىپ كورپوراتسياسى» ج ش س باس ديرەكتورىنىڭ بۇرىنعى ورىنباسارى ءالجان اقمولدايەۆتى، بيزنەسمەن دۋمان نۇربايەۆتى جانە «قازاگرو فينانس» ا ق باسقارماسىنىڭ بۇرىنعى ءتوراعاسى عۇمار راحىمجانوۆتى بوساتۋدى ۇسىندى. مۇنداي شەشىم ولاردىڭ ءوز قىلمىستارىن مويىنداۋى مەن تەرگەۋ امالدارىنا كومەك كورسەتكەنى ءۇشىن قابىلداندى.

 اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى