قوستاناي وبلىسىنداعى الاپات قۇيىن: 12 ادام زارداپ شەكتى

بۇل تۋرالى اۋرۋحانانىڭ باس دارىگەرى گۇلنار عاليەۆا حابارلادى.

ول 10 ادامنىڭ ستاتسيونارعا وقيعا ورنىنان جەتكىزىلگەنى، ال ەكەۋى اۋرۋحاناعا وزدەرى شاعىمدانىپ كەلگەنىن اتاپ ءوتتى.

«زارداپ شەككەندەردىڭ ەشقايسىسى كۇردەلى جاراقات العان جوق»، - دەدى عاليەۆا.

سارىكول اۋدانى ورتالىعىندا قىسقا بولسا، قيراتۋ كۇشى مول بولعان قۇيىن سپارتاكيادانىڭ اشىلۋى كەزىندە باستالدى. نەگىزگى سوققى ىشىندە كوپ ادام جۇرگەن ستاديونعا ءتۇستى. كەيبىر كۋاگەرلەر تابيعي اپاتتى سمارتفوندارىنىڭ تاسپاسىنا ءتۇسىرىپ، جازبالاردى عالامتورعا سالىپ ۇلگەرگەن.

ءبىر مينۋتتان كەم بولماعان قۇيىن كوپ نارسەنى قيراتىپ كەتتى. كۋاگەرلەردىڭ ايتۋىنشا، ونىڭ اۋقىمى 10 مەترگە جەتكەن، ال بيىكتىگى بەس قاباتتى ۇيمەن تەڭ بولعان. ول ساۋدا پالاتكالارىن، ۇستەلدەر مەن ورىندىقتار، باتۋتتاردى ونداعان مەتر جەرگە ۇشىرىپ اكەتتى.

سارىكول اۋدانى ىشكى ىستەر ءبولىمىنىڭ باسشىسى ەلەنا باۋەر تابيعي اپاتتىڭ كەلتىرگەن شىعىنى شامامەن 150 مىڭ تەڭگەنى قۇراپ وتىرعانىن ايتتى.

قوستاناي وبلىسىنىڭ اكىمى نۇرالى ءسادۋاقاسوۆ وقيعاعا تۇسىنىكتەمە بەرىپ، ءتۇرلى مەرەكەلەر كەزىندە شۇعىل قىزمەتتەردىڭ جۇمىسىن كۇشەيتۋدى تاپسىردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى