قاراعاندىلىق ايەل ءوزىنىڭ 12 جىل بۇرىن جەرلەنگەنىن كەزدەيسوق ءبىلدى
وندا بۇل ايەلگە ونىڭ كوپتەن بەرى تىرىلەر قاتارىندا جوق ەكەنىن ەستىرتكەن، دەپ حابارلادى nv.kz.
ءوزىنىڭ بۇل جاعدايىن ۆالەنتينا يۆانوۆنا كەزدەيسوق ءبىلدى. قاراشانىڭ باسىندا اعاسىن جەرلەگەننەن كەيىن ونىڭ ءولىمى تۋرالى انىقتاما الۋ ءۇشىن ح ق ك و-ىنا بارعان بولاتىن.
- كوزىمدى سالىپ تۇرمىن، قىزمەت كورسەتىپ وتىرعان قىز ماعان ءبىرتۇرلى قارايدى، - دەپ اڭگىمەلەدى ۆالەنتينا يۆانوۆنا. - بىرەۋدى شاقىرىپ كەلدى، ودان كەيىن تاعى بىرەۋلەر كەلدى. ءبارى بىرەسە كومپيۋتەرگە قارايدى، بىرەسە ماعان قارايدى، سودان كەيىن «شىنىندا ءسىزبىسىز؟»، دەپ سۇرادى. مەن بوركىمدى شەشتىم دە: «نەمەنە، ۇقسامايمىن با؟»، - دەپ سۇرادىم. الدەبىر الاياقتار مەنىڭ قۇجاتتارىممەن ۇلكەن نەسيە العان شىعار دەپ شوشىپ كەتتىم. ءبىر ۋاقىتتا بارىپ، «ءسىز بىزدە ولگەندەر قاتارىندا تىركەۋلىسىز» دەدى. مەن نە بولعانىن بىلمەي، ەسىمنەن تانىپ قالدىم. شىعىپ، بىردەن كۇيەۋىمە حابارلاستىم. ەشتەڭە ايتا المايمىن، دىرىلدەپ كەتتىم.
ۆالەنتينا يۆانوۆناعا ون كۇن كۇتۋگە كەڭەس بەردى جانە قاتەنى تۇزەيمىز، مىندەتتى تۇردە «تىرىلتەمىز» دەپ سەندىردى. ال ول ءبىر ايدان كەيىن زەينەتكەرلىككە شىعۋى قاجەت ەدى. ول تەزىرەك قۇجاتتارىن جيناستىرۋى ءتيىس. ءبىراق تا قايدا بارسا دا، باس تارتادى. سوڭعى رەت ول زەينەتاقى سالىمدارى ءۇشىن ەسەپشوت اشقىسى كەلگەن، وعان «ءبىز ولگەن ادامدارعا قىزمەت كورسەتپەيمىز»، دەپتى.
ۆالەنتينا يۆانوۆنا 12 جىلدان بەرى مارقۇمدار قاتارىندا ەكەنى انىقتالدى. ول 2002 - جىلى 45 جاسقا تولۋىنا بايلانىستى جەكە كۋالىگىن اۋىستىرماقشى بولعان، بار پالە سول كەزدە باستالعان. سودان بەرى ول زاڭسىز ءومىر سۇرگەن سياقتى بولىپ تۇردى. ادەتتە ول ەشقايدا شىعا بەرمەيتىن، ءۇي شارۋاشىلىعىمەن اينالىساتىن، سىرتقى شارۋالاردى كۇيەۋى تىندىراتىن ەدى. ول ءوزىنىڭ ازاماتتىق قۇقىعىن قالپىنا كەلتىرمەكشى بولىپ ەدى، مەملەكەتتىك تورەشىلدىك ماشينانىڭ قاساڭدىعىنان زارداپ شەكتى.
- ءبىز، ارينە، ودان كەشىرىم سۇرادىق، - دەيدى كوشى-قون پوليتسياسى ءبولىمىنىڭ اعا ينسپەكتورى ءاليا وماروۆا. - ەگەر ءبىز بۇل جاعداي قازىرگى كۇنى بولسا، ماسەلەنى تەز شەشەر ەدىك. ال 10 جىل بۇرىن ۇلكەن قاتەلىك جىبەرىلگەن. بۇرىنعى كۋالىكتى ەكى جىلدان كەيىن قاتەلەسىپ، قايتىس بولۋىنا بايلانىستى دەپ جويىپ جىبەرگەن. ول كەزدە قۇجات اۋىستىرۋ كوپ بولدى. سونداي ابىر-سابىر كەزدە قاتەلىك كەتىپ تۇر. ەندى قازىر ءبىز ارىپتەستەرىمىزدى اسىقتىرۋدامىز.
ال ەندى قاراعاندىنىڭ تاعى ءبىر تۇرعىنى نادەجدا چۋرسينا ءبىر جىل بويى ءوزىنىڭ قازاقستان ازاماتى ەكەنىن دالەلدەي الماي ءجۇر. اعاسى ولگەننەن كەيىن مۇراگەرلىك قۇقىعىن قۋالاعان. ال نوتاريۋسقا بارسا، ءوزىنىڭ باسقا ەلگە تۇراقتى مەكەنجايىنا كەتكەنى انىقتالعان. قايدا كەتكەنى تاعى بەلگىسىز. سولتۇستىك قازاقستان وبلىسىنداعى ح ق ك و شاتاستىرعان ءبارىن. بۇرىن سول جاقتا تۇرعان بولاتىن. ەندى دالەلدەۋ قيىنعا سوعىپ تۇر. ءوڭىرارالىق حات الماسۋ ۇزاققا سوزىلۋدا. جاقىندا بالالى بولىپ، اي سايىنعى جاردەماقىعا ارەڭ قول جەتكىزدى.
