بيىلعى توعىز ايدا 1265 ادام جول اپاتىنان مەرت بولعان - ءى ى م

بۇل تۋرالى ق ر ءى ءى م اكىمشىلىك پوليتسيا كوميتەتى ءتوراعاسىنىڭ ورىنباسارى سەرىك ءتۇسىپوۆ ايتتى، دەپ حابارلايدى قازاقپارات ءتىلشىسى.

«2020 -جىلدىڭ 9 ايىندا 8933 جول- كولىك اپاتى ورىن الىپ، سالدارىنان 1265 ادام قازا تاپسا، 11780 ادام جاراقات الدى. وتكەن جىلدىڭ ءدال وسىنداي كەزەڭىمەن سالىستىرعاندا جول-كولىك اپاتى -22، قازا بولعاندار - 16، جاراقاتتانعاندار - 23 پايىزعا تومەندەگەنى بايقالادى. جول- كولىك اپاتىنىڭ نەگىزگى سەبەبى - ءالى دە بولسا جول ءجۇرۋ ەرجەسىن بۇزۋ بولىپ تۇر. جول اپاتتارىنىڭ ۇشتەن ءبىرى جىلدامدىق رەجيمىن اسىرۋدان ورىن العان. مۇنداي 2833 وقيعا بولىپ، 527 ادام قايتىس بولدى، 3918 ادام جارالاندى. كولىك اپاتى كەزىندە 344 جاياۋ جۇرگىنشى مەرت بولىپ، 2897 سى جاراقات الدى. سونىمەن قاتار جاياۋ جۇرگىنشىلەردىڭ كەسىرىنەن 356 جول اپاتى بولدى. ودان 75 ادام قازا تاۋىپ، 298 ى جارالاندى. ەلدى مەكەندەردە 6740 جول-كولىك اپاتى ورىن العان»، - دەدى ول ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

سەرىك ءتۇسىپوۆتىڭ اتاپ وتۋىنشە، ءى ءى م جول قاۋىپسىزدىگىن قامتاماسىز ەتۋگە باعىتتالعان شارالار كەشەنىن تۇراقتى تۇردە جۇزەگە اسىرىپ كەلەدى. جولدارداعى باقىلاۋ كۇشەيتىلگەن. ەلدىمەكەندەردە پاتۋرلدىك پوليتسيا كەزەكشىلىككە شىعاتىن 2 مىڭنان استام باعدار مەن قالا ماڭىنداعى 211 اۆتوموبيل جولى ايقىندالعان.

«مۇددەلى مەملەكەتتىك ورگاندارمەن بىرگە جەدەل الدىن الۋ شارالارى تۇراقتى وتكىزىلەدى. جىل باسىنان بەرى پوليتسيا قىزمەتكەرلەرى 3 ميلليوننان استام جول ءجۇرىسى ەرەجەسىن بۇزۋشىلىقتى انىقتادى. 119 مىڭ جاياۋ جۇرگىنشى اكىمشىلىك جاۋاپكەرشىلىككە تارتىلىپ، كولىگىن ماس كۇيدە جۇرگىزگەن 13 مىڭ جۇرگىزۋشى ۇستالدى. سوت 15 مىڭنان استام جۇرگىزۋشىنى كولىك جۇرگىزۋ قۇقىعىنان ايىردى. جول ءجۇرىسى ەرەجەسىن بۇزعان 12,5 مىڭ ادام اكىمشىلىك تۇتقىنعا الىندى»، - دەدى سەرىك ءتۇسىپوۆ.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى