الماتىعا جىل سوڭىنا دەيىن قىتايدان 125 اۆتوبۋس اكەلىنەدى

شاھارىمىزدا جاڭادان اشىلعان ءنومىرى ەكىنشى مۋنيتسيپالدى پارك تاعى 25 قوعامدىق كولىكپەن تولىعادى. ستاتيستيكا بويىنشا، كوگىلدىر وتىنمەن جۇرەتىن اۆتوبۋستار كۇنىنە ورتا ەسەپپەن 1000 جولاۋشى تاسىمالدايدى. ياعني، قالاداعى قوعامدىق كولىكتەردىڭ جولاۋشىلاردى تاسىمالداۋ كورسەتكىشى تاعى 25 مىڭعا ارتادى.

«قازىر 25 اۆتوبۋس كەدەندە تۇر. سول اۆتوبۋستار قالا باعىتتارىندا جۇمىس جاسايتىن بولادى. جىل سوڭىندا تاعى 125 اۆتوبۋس اكەلىنەدى»، - دەدى الماتى ق. جولاۋشىلار كولىگى باسقارماسى باسشىسىنىڭ ورىنباسارى ەرلان ءادىلوۆ.

ەكىنشى مۋنيتسيپالدى پاركتە ازىرگە 50 قوعامدىق كولىك قىزمەت كورسەتۋدە. جىل سوڭىنا دەيىن شاھارعا تاعى 125 اۆتوبۋس جەتكىزىلەدى. كورشى قىتايدان اكەلىنگەن قوعامدىق كولىكتەردىڭ جۇرگىزۋشىلەرى دە ىرىكتەلىپتى. سۋ جاڭا تەحنيكانى مەڭگەرەم دەگەن ازاماتتارعا قويىلاتىن تالاپ تا كۇشتى. بىرىنشىدەن، قوعامدىق كولىكتى مەڭگەرۋى بويىنشا كەم دەگەندە ءۇش جىل ءوتىلى بولۋى كەرەك. ودان كەيىن، تەحنيكالىق ءبىلىمى مەن قوسا تاعى باسقا دا مىندەتتەر بار.

«ءبىرىنشى پارتياسى 50 اۆتوبۋسىمىز ءجۇرىپ ءجۇر. كەشە عانا تاعى 25 كەلدى. ولاردىڭ جۇرگىزۋشىلەرى دايىن. جىلدىڭ اياعىنا دەيىن جالپى كەلەتىن 200 اۆتوبۋسقا جۇرگىزۋشىلەر الۋىمىز كەرەك. وعان ءبىز دايىندىقتى ءالى توقتاتقان جوقپىز. ءارى قاراي جۇرگىزە بەرەمىز»، - دەدى «الماتى ەلەكترو ترانس» ج ش س باس ديرەكتورىنىڭ ورىنباسارى ابدىبەك مۇحامەدجانوۆ.

 جىل باسىنان بەرى شاھارداعى 30 قوعامدىق كولىك جۇرگىزۋشىسى جول ەرەجەسىن بۇزىپ، جۇمىسىنان بوساتىلعان. وسىعان وراي قۇزىرلى ورىندار قالاداعى قوعامدىق كولىكتەردىڭ تىزگىنىن وزبەك، قىرعىز جانە تاجىك ازاماتتارىنا بەرۋدى ۇسىنعان ەدى. ءبىراق، اتالمىش ۇسىنىس ناقتى شەشىمىن تاپپادى. سوندىقتان، ازىرگە مۋنيتسيپالدى اۆتوبۋستاردى ەل ازاماتتارى تىزگىندەي بەرمەك. ال، اسپان استى ەلىنەن جونەلتىلگەن 25 قوعامدىق كولىك قازىرگى ۋاقىتتا كەدەندىك راسىمدەۋدەن وتۋدە. جوسپار بويىنشا، بۇگىن تۇندە الماتى قالاسىنا تابان تىرەيدى.

almaty.tv

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى