اتىراۋدا قۇربان ايتتىڭ ءبىرىنشى كۇنى قوي باعاسى 120 مىڭ تەڭگەگە دەيىن كوتەرىلدى
بۇگىن ەلىمىزدە ءۇش كۇندىك قۇربان ايت باستالدى. اتىراۋدا قۇربان مالىن شالۋعا نيەت ەتكەندەر قاتارى كوپ. الايدا، مال باعاسى شارىقتاپ شىعا كەلدى. ماسەلەن، اتىراۋدا رەسەيدىڭ استراحان وبلىسىمەن شەكاراعا دەيىن قاتىنايتىن تاسجولدىڭ جانىنداعى مال بازارىندا قوي ساتۋشىلار دا از ەمەس. بازاردىڭ ىشىنە سىيماعان ساتۋشىلار مالىن دالادا ساۋدالاپ تۇر. ولاردىڭ باعاسى بازار ىشىندەگىدەن ارزانداۋ ەكەنى بايقالادى. بۇل بازارعا قوي باتىس قازاقستان وبلىسىنان، اتىراۋدىڭ قىزىلقوعا، قۇرمانعازى، يندەر اۋدارىنان اكەلىنگەن. بازارداعى باعاعا توقتالار بولساق، تۇساق ءۇشىن 60-65 مىڭ تەڭگە سۇرايدى. ەرتە تۋعان قوزىلاردىڭ ەڭ تومەنگى باعاسى - 35 مىڭ تەڭگە. مۇندا ءبىر قويدى ءۇش مىڭ تەڭگەگە سويىپ بەرەدى. ءىرى قارانىڭ باعاسى 370 مىڭ تەڭگەدەن باستالادى. بۇل - ءۇش جاسار وگىزدىڭ باعاسى. ال، ۇرعاشى سيىردىڭ ەڭ ارزانى - 400 مىڭ تەڭگە.
«ءوزىم باققان وگىزدى ساتۋعا اكەلدىم. شامامەن 350 كەلى تارتاتىنىنا سەنىمدىمىن. سالماعىنا، قوڭىنا بايلانىستى 700 مىڭ تەڭگەگە ساتامىن. بۇدان تومەن باعاعا بەرە المايمىن»، - دەيدى يندەر اۋدانىنان كەلگەن ەر ادام. اتىراۋلىق مال الۋ ءۇشىن كوپ باراتىن بازاردىڭ ءبىرى «تۋما» دەپ اتالادى. قالانىڭ ورتالىعىندا ورنالاسقان بۇل ساۋدا ورنىنداعى باعا وزگەلەرىنەن قىمباتتاۋ كورىنەدى. مۇندا قوزىنى 40 مىڭ تەڭگەگە ساتىپ الۋعا بولادى. ءىرى قوي 100 مىڭ تەڭگە باعالانىپ تۇر. ال، سەمىز ىسەك ءۇشىن 120 مىڭ تەڭگە سۇرايدى. بۇل بازاردا ءار قويدى سويۋ باعاسى - ءتورت مىڭ تەڭگە.
«جىل سايىن قۇربان ايت جاقىنداعاندا مال باعاسى شارىقتاپ شىعا كەلەدى. ساۋاپ جينايتىن كۇندەرى مۇنى رەتتەيتىن تەتىك جوق پا؟ ءبىر ىسەكتى 120 مىڭ تەڭگەگە ساتىپ الۋ مۇمكىن ەمەس»، - دەيدى قالا تۇرعىنى نۇرلان ءتاجىعالي ۇلى.
ەسكە سالا كەتەلىك، بۇدان بۇرىن اتىراۋدا قۇربان ايت كەزىندە مال سويۋ پۋنكتتەرىنىڭ جۇمىسىن قادالاعاۋ كۇشەيتىلەتىنىن حابارلاعان ەدىك.
