قازاقستان ليۆانعا 120 بىتىمگەر اسكەر جىبەرەدى

«قازىرگى كەزدە ءبىزدىڭ بولىمشەنى بىتىمگەرلىك ميسسيانىڭ بىرىنە باعىتتاۋ ءۇشىن اۋقىمدى دايىندىق جۇمىسىن جۇرگىزىپ جاتىرمىز»، - دەپ ناقتىلادى ءمينيستردىڭ ورىنباسارى.

ونىڭ اتاپ وتۋىنشە، ليۆانعا شامامەن 120 ادام جىبەرىلەدى.

«ءبىز بارلىق قاجەتتى راسىمدەردەن وتتىك، ەندى كەيبىر ستاندارتتى راسىمدەر عانا قالدى. بۇل شارالاردى ب ۇ ۇ تالاپ ەتىپ وتىر. كۇزگە قاراي روتانى باعىتتايمىز. الدىن الا جوسپار بويىنشا ولار ليۆانداعى ميسسياعا بارادى»، - دەدى ت. مۇحتاروۆ.

وسى ورايدا ەلىمىزدە بىتىمگەرلىك قىزمەت تۋرالى ءتيىستى زاڭناما قابىلدانعانىن ەسكە سالىپ وتكەن ت. مۇحتاروۆ: «بۇگىندە ب ۇ ۇ- مەن بىرلەسە جۇمىس ىستەپ جاتىرمىز. ليۆانعا بارىپ، قىزمەتتى اتقاراتىن جەرمەن تانىسىپ كەلدىم. بۇل بىتىمگەرلىك ميسسيا بەيبىتشىلىكتى قولداۋعا نەگىزدەلگەن»، - دەپ ءتۇسىندىردى.

 بۇدان بۇرىن حابارلانعانداي، بيىل قاڭتار ايىندا ق ر قورعانىس مينيسترلىگى «قازاقپارات» ح ا ا- عا سانى روتاعا دەيىن اسكەري بولىمشەنى جىبەرۋ بويىنشا جۇمىستار جۇرگىزىلىپ جاتقانىن مالىمدەگەن بولاتىن.

قورعانىس مينيسترلىگىنىڭ مالىمەتىنشە، «قازبات» ساپىنا ەنۋگە نيەتتىلەر قاتارى قالىڭ كورىنەدى. سوندىقتان دا ىرىكتەۋدىڭ قاتاڭ ءتارتىبى بەكىتىلگەن. وسى ورايدا دەنساۋلىق جاعدايى، سپورتتىق دايارلىعى، كاسىبي داعدىلارى، تىلدەردى مەڭگەرۋى، پسيحولوگيالىق تۇراقتىلىعى جانە باسقا دا جەكە قاسيەتتەرى ەسكەرىلەدى.

فوتو: mod.gov.kz

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى