قازاقستاندىق 1200 اسكەري قىزمەتشى شارتتى زاڭسىز اسكەري قۇرالىمدى جويدى - فوتو
بىرلەسكەن وقۋ-جاتتىعۋ «شىعىس» وڭىرلىك قولباسشىلىعىنىڭ «يزەندى» پوليگونىندا ءوتتى، دەپ حابارلايدى ق ر قورعانىس مينيسترلىگىنىڭ باسپا ءسوز قىزمەتى.
سەناري بويىنشا شارتتى زاڭسىز اسكەري قۇرالىم مەملەكەتتىك شەكارانى بۇزدى جانە زاڭسىز ەل اۋماعىنا باسا-كوكتەپ كىردى. قىلمىستىق توپتىڭ ءبىر بولىگى شەكاراشىلاردى ۇستاپ، قالعاندارى قورعانىستى بۇزىپ ءوتتى جانە العا قاراي ىلگەرىلەدى. وسى ساتتە وقۋ-جاتتىعۋعا اۆياتسيا قوسىلدى. ۇشقىشتار زاڭسىز توپتاسۋدىڭ ورنالاسقان ورنىن بەلگىلەدى جانە اۆياسوققىلاردى جۇزەگە اسىردى.
وقيعا ورنىنا كەلىپ جەتكەن شابۋىلدىق توپ زاڭسىز اسكەري قۇرالىمدى جويۋ بويىنشا سوڭعى ءىس-قيمىلداردى جۇرگىزدى. جالپى، اسكەري قىزمەتشىلەر قويىلعان جاۋىنگەرلىك تاپسىرمانى ءساتتى ورىندادى جانە وزدەرىنىڭ جاۋىنگەرلىك ازىرلىگىن راستادى.
بۇگىننەن باستاپ جاۋىنگەرلەر جاياۋ ءجۇرىس تارتىبىندە وزدەرىنىڭ ۇدايى ورنالاسۋ ورىندارىنا قايتادى. وقۋ-جاتتىعۋ «شىعىس» ءو ڭ ق اسكەرلەرىنىڭ قولباسشىسى گەنەرال-مايور مۇرات بەكتانوۆتىڭ باسشىلىق ەتۋىمەن ءوتتى.
اسكەري جيىنعا قاتىسۋ ءۇشىن بايلانىس باتالونىنىڭ اسكەري قىزمەتشىلەرى، ماتەريالدىق-تەحنيكالىق قامتاماسىز ەتۋ پولكى، 32355-ك اسكەري ءبولىمىنىڭ شتابتىق روتاسى تارتىلدى.
