پاريجدەگى وليمپيادا ويىندارىندا ەل نامىسىن قورعاۋعا شىعىس قازاقستاننان 11 ۇمىتكەر ىرىكتەلدى
2024-جىلى 26- شىلدە مەن 11- تامىز ارالىعىندا پاريجدە وتەتىن 33-جازعى وليمپيادا ويىندارىندا الەمنىڭ ءار جەرىنەن جيىلعان سپورتشىلار 32 سپورت تۇرىنەن باق سىناسپاق. قازاقستاننىڭ كوك تۋىن كوكتە شارىقتاتۋدى ماقسات ەتكەن سپورتشىلارىمىز قىزۋ دايىندىق ۇستىندە.
ونىڭ ىشىندە شىعىس قازاقستان وبلىسىندا سپورتتىڭ 7 ءتۇرى بويىنشا 18 ادام وليمپيادا ويىندارىنا قاتىسۋعا ۇمىتكەر رەتىندە ىرىكتەلىپ وتىر. بۇل تۋرالى بۇگىن شقو ايماقتىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا وڭىرلىك دەنە شىنىقتىرۋ جانە سپورت باسقارماسى باسشىسىنىڭ ورىنباسارى سەرىك قۇسىمبايەۆ ايتتى.
«جەڭىل اتلەتيكادان ۇمىتكەرلەر قاتارىندا نادەجدا دۋبوۆيتسكايا، ەلينا ميحينا، جاننا ماماجانوۆا، گالينا ياكۋشيەۆا، دەيزي دجەپكەمەي، كارولينا كيپكيرۋي، شادەراك كوەچ، نورا تانۋي، ەركىن كۇرەستەن ازامات داۋلەتبەكوۆ، دانيار قايسانوۆ، گرەك-ريم كۇرەسىنەن ەرنار جانە ەرنۇر فيداحمەتوۆالار، ەسكەك ەسۋ سلالومىنان بايداركالاردا جانە كانوەدا الەكساندر كۋليكوۆ، قۋانىش ەرگايىپوۆ، بايداركا مەن كانوەدە ەسۋ بويىنشا مارگاريتا تورلوپوۆا، اۋىر اتلەتيكادان دەنيس ۇلانوۆ جانە سەمسەرلەسۋدەن رۋسلان قۇربانوۆ پەن ۆاديم شارلايموۆ بار»، - دەيدى ول.
ونىڭ ايتۋىنشا، بۇگىنگى تاڭدا وليمپيادانى ساناماعاندا ءارتۇرلى سپورت تۇرلەرى بويىنشا قازاقستان رەسپۋبليكاسى قۇراماسىنىڭ ساپىندا شىعىسقازاقستاندىق 707 سپورتشى ونەر كورسەتىپ ءجۇر.
«2023-جىلدىڭ 6 ايىندا وبلىس سپورتشىلارى ءتۇرلى سپورت تۇرلەرى بويىنشا 3303 مەدال جەڭىپ الدى. ونىڭ ىشىندە 1208 التىن، 1031 كۇمىس جانە 1064 قولا بار. 300 سپورتشى 35 حالىقارالىق تۋرنيرگە قاتىسۋدى جوسپارلاپ وتىر. ال 170 سپورتشى الەم جانە ازيا چەمپيوناتتارىندا باق سىناماق»، - دەيدى سەرىك قۇسىمبايەۆ.
