بيلەتتەر تەگىن تاراتىلادى: استانا كەشتەرى 11- حالىقارالىق ونەر فەستيۆالى باستالادى
ولار «استانا وپەرا» مەن «استانا بالەت» تەاترلارىندا وتەدى، دەپ حابارلايدى قازاقپارات فەستيۆالدىڭ باسپا ءسوز قىزمەتىنە سىلتەمە جاساپ.
«جوبا اياسىندا كورەرمەندەر كلاسسيكا، حالىق، ەسترادا مۋزىكاسىن قازاقستانعا جانە بارشا الەمگە تانىتىپ جۇرگەن ۇزدىك ورىنداۋشىلاردىڭ ونەرىن تەگىن تاماشالاي الادى. فەستيۆالدىڭ قوناقتارى الەمدىك ساحنالاردى باعىندىرعان ونەر جۇلدىزدارى بولعانىنا قاراماستان، كونسەرتتەرگە بارلىق بيلەتتەر تەگىن تاراتىلادى. فەستيۆالدىڭ ەرەكشە قوناقتارى - مۇمكىندىگى شەكتەۋلى جاندار»، - دەلىنگەن مالىمدەمەدە.
العاشقى كونسەرت 30- مامىر كۇنى ساعات 19:00-دە «استانا وپەرانىڭ» كامەرالىق زالىندا وتەدى. كورەرمەندەر بەلگىلى كومپوزيتور پەر تيللۋانىڭ (فرانسيا) شىعارماشىلىق كەشىن تاماشالاي الادى. كونسەرتكە قاتىسۋشىلار: تيمۋر ۋرمانچەيەۆ، فورتەپيانو (قازاقستان)، اننا سەروۆا، الت (يتاليا)، كۆەنتين فوگەل، سكريپكا (فرانسيا)، شولپان مانكەيەۆا، سكريپكا (قازاقستان)، ايگەريم ەرساينوۆا- شۋستەر، قوبىز (فرانسيا)، مۋرات ناربەكوۆ، ۆيولونچەل (قازاقستان)، دينا ميرمانوۆا، فورتەپيانو (قازاقستان).
«استانا بالەت» تەاترىندا 2- ماۋسىم كۇنى ساعات 19:00-دە وتەتىن كونسەرتتە بەرليننىڭ كونتسەرتتىك وركەسترىنىڭ سوليسى، ۆيولونچەليست ەدگار مورو ونەر كورسەتەدى. كونسەرتتىڭ ديريجەرى - ماەسترو فاۋستو فۋنگاروللي. الەمگە تانىلعان مۋزىكانتتار موتسارت پەن گايدننىڭ ۇزدىك تۋىندىلارىن ورىندايدى.
3- ماۋسىم كۇنى بەرليننىڭ كونسەرتتىك وركەسترىنىڭ سوليسى، فورتەپيانو شەبەرى ۆاديم حولودەنكو جاڭا كونسەرتىن ۇسىنادى. الەمگە جىلدامدىعى جانە تەحنيكالىق شەبەرلىگى ەرەكشە مۋزىكانتتاردىڭ ءبىرى رەتىندە تانىلعان ۆاديم حولودەنكو موتسارتتىڭ فورتەپيانوعا ارنالعان اتاقتى شىعارمالارىمەن قۋانتادى.
«روك مۋزىكاسىنىڭ التىن حيتتەرى» اتتى ۇلكەن گالا- كونسەرت -4 ماۋسىم كۇنى ساعات 18:00-دە «استانا بالەتتىڭ» ساحناسىندا وتەدى. ارنايى شاقىرىلعان سوليستەر يوگان بودينگ (شۆەتسيا)، سيمونە روماناتو (يتاليا)
Queen, Beatles, Kiss, Pink Floyd, Metallica, Scorpions, Led Zeppelin, Europе
جانە باسقا دا اتاقتى حيتتەردى ورىندايدى. كونسەرتتىڭ ديريجەرى - بەلگىلى كومپوزيتور روبەرتو مولينەللي.
«ونەر سۇيەر قاۋىمعا زور قۋانىش سىيلايتىن حالىقارالىق فەستيۆالدىڭ ۇيىمداستىرۋشىسى - نۇر- سۇلتان قالاسى اكىمدىگىنىڭ قولداۋىمەن «دەگدار» گۋمانيتارلىق قورى. بيلەتتەردى تەگىن الۋ ءۇشىن 877783887107 نومىرىنە حابارلاسۋعا بولادى»، - دەيدى ۇيىمداستىرۋشىلار.
ايتا كەتسەك، «استانا كەشتەرى» فەستيۆالى ەلىمىزدە 2012 -جىلدان بەرى جىل سايىن وتكىزىلىپ كەلەدى. فەستيۆال مۋزىكالىق ونەردىڭ سان ءتۇرلى جانرلارىن بىرىكتىرەتىن ەرەكشە كونسەپتسيانىڭ ارقاسىندا ەلىمىزدىڭ مادەني ومىرىندەگى يگى داستۇرگە اينالدى. سونداي- اق، 1- ماۋسىم استانادا رەسپۋبليكالىق بالالار فەستيۆالى وتەدى.
