كارانتين سالدارىنان 11 مىڭ سالىق تولەۋشىنىڭ ىسكەرلىك بەلسەندىلىگى قۇلدىرادى - قارجى ءمينيسترى
بۇل تۋرالى بۇگىن ۇكىمەت وتىرىسىندا ق ر قارجى ءمينيسترى ەرۇلان جاماۋبايەۆ ايتتى، دەپ حابارلايدى قازاقپارات ءتىلشىسى.
«الدىن الا دەرەكتەرگە سايكەس، وسى جىلعى 9 ايدىڭ قورىتىندىسى بويىنشا مەملەكەتتىك بيۋدجەتتىڭ اتقارىلۋ كورسەتكىشتەرى كەلەسىدەي قالىپتاستى. مەملەكەتتىك بيۋدجەتكە 6,1 تريلليون تەڭگە سوماسىندا كىرىستەر ءتۇستى نەمەسە جوسپار 95,5 پايىزعا اتقارىلدى. رەسپۋبليكالىق بيۋدجەتكە كىرىستەر 3 تريلليون 853 ميلليارد تەڭگە سوماسىندا ءتۇستى نەمەسە جوسپار 85,8 پايىزعا اتقارىلدى. كىرىستەر بويىنشا جوسپاردىڭ اتقارىلماۋى 638 ميلليارد تەڭگەنى قۇرادى. ونىڭ ىشىندە سالىقتار - 791 ميلليارد تەڭگە»، - دەدى مينيستر.
ونىڭ اتاپ وتۋىنشە، نەگىزگى اتقارىلماۋ سومالارى قوسىلعان قۇن مەن كورپوراتيۆتىك تابىس سالىقتارىنا تيەسىلى بولدى.
«كورپوراتيۆتىك تابىس سالىعىنىڭ اتقارىلماۋىنا مىناداي فاكتورلار اسەر ەتتى. بىرىنشىدەن - نەگىزگى ەكسپورتتىق پوزيتسيالار بويىنشا باعانىڭ ورتا ەسەپپەن 13,3 پايىزعا قۇلدىراۋى؛ ارەكەتسىز سالىق تولەۋشىلەر سانىنىڭ ارتۋى، 850 ءىرى سالىق تولەۋشى بويىنشا مالىمدەلگەن اۆانستىق تولەمدەر سوماسىنىڭ وتكەن جىلدىڭ 9 ايىمەن سالىستىرعاندا 243,5 ميلليارد تەڭگەگە تومەندەۋى جانە ەكىنشى دەڭگەيدەگى بانكتەردەن تۇسەتىن تۇسىمدەردىڭ 10,2 ميلليارد تەڭگەگە ازايۋى.
قوسىلعان قۇن سالىعى بويىنشا جوسپاردىڭ نەگىزگى اتقارىلماۋ سەبەپتەرى كەلەسىدەي. بىرىنشىدەن - وتكەن جىلدىڭ ۇقساس كەزەڭىمەن سالىستىرعاندا قوسىلعان قۇن سالىعىن قايتارۋدىڭ 60 پايىزعا نەمەسە 200 ميلليارد تەڭگەگە ءوسۋى.
ەكىنشىدەن - «ەلەكتروندىق شوت- فاكتۋرالار» اقپاراتتىق جۇيە دەرەكتەرىنە سايكەس ساتۋ بويىنشا اينالىمداردىڭ 11 پايىزعا ازايۋى. نەگىزگى تومەندەۋ تاۋ- كەن ونەركاسىبى سالاسىنا تيەسىلى بولىپ وتىر. وندا اينالىمدار 2019 -جىلدىڭ ۇقساس كەزەڭىمەن سالىستىرعاندا 33 پايىزعا نەمەسە 4,3 تريلليون تەڭگەگە ازايعان. ءۇشىنشى - كارانتين رەجيمىنىڭ ەنگىزىلۋىنە بايلانىستى شامامەن 11 مىڭ سالىق تولەۋشىنىڭ ىسكەرلىك بەلسەندىلىگى قۇلدىرادى. ولاردان تۇسىمدەر ەداۋىر ازايدى»، - دەدى ەرۇلان جاماۋبايەۆ.
دەگەنمەن، مينيستر جوسپار پايدالى قازبالار وندىرۋگە سالىناتىن سالىق پەن شيكى مۇنايعا ەكسپورتتىق كەدەن باجى بويىنشا اسىرا ورىندالعانىن ايتتى. سونىمەن قاتار سالىقتىق ەمەس تۇسىمدەر دە 154 ميلليارد تەڭگەگە ارتىعىمەن ورىندالعان.
«جەرگىلىكتى بيۋدجەتتەردىڭ كىرىستەرى 118 پايىزعا اتقارىلدى جانە 2 تريلليون 274 ميلليارد تەڭگەنى قۇرادى. جالپى جوسپار 348 ميلليارد تەڭگەگە اسىرا ورىندالدى. ونىڭ ىشىندە سالىقتار بويىنشا - 319 ميلليارد تەڭگەگە. بارلىق وڭىرلەردە كىرىستەر بويىنشا جوسپارلار اسىرا ورىندالۋدا. ناتيجەسىندە جەرگىلىكتى بيۋدجەتتەردىڭ شوتتارىندا بيۋدجەت قاراجاتىنىڭ كاسسالىق قالدىقتارىنىڭ ەداۋىر سوماسى قالىپتاستى. ءبىز بۇل جاعدايدا رەسپۋبليكالىق بيۋدجەتتى قالىپتاستىرۋ كەزىندە ەسكەرەمىز»، - دەدى ول.
اۆتور: مارلان جيەمباي
