باعىنىشتى قىزمەتكەرى جەمقورلىقپەن ۇستالعان 11 باسشى وتستاۆكاعا كەتۋى مۇمكىن
اگەنتتىك وكىلىنىڭ ايتۋىنشا، 2019 -جىلدىڭ 10-جەلتوقسانىنان باستاپ باعىنىشتى قىزمەتكەرى جەمقورلىقپەن ۇستالعان جاعدايدا باسشىسى دا جەكە جاۋاپكەرشىلىككە تارتىلاتىنى جايلى تالاپ كۇشىنە ەنگەن.
«بۇل رەتتە باسشىعا قاتىستى وتستاۆكانى قابىلداۋ نەمەسە ونى تارتىپتىك جاۋاپكەرشىلىككە تارتۋ ءۇشىن ۇستالعان باعىنىشتى قىزمەتكەر تىكەلەي كىمگە باعىناتىنىن انىقتاپ، ايقىنداپ الۋ كەرەك. ماسەلەن ورتالىق مەملەكەتتىك ورگانداعى ءمينيستردىڭ تىكەلەي باعىنىشتىلارى - ونىڭ ورىنباسارلارى، جاۋاپتى حاتشىسى، اپپاراتتاردىڭ باسشىسى نەمەسە اۋماقتىق بولىمشەلەردىڭ باسشىسى»، - دەدى ايگۇل بازاربايەۆا اگەنتتىكتىڭ ونلاين رەجيمدە وتكەن باسپا ءسوز ءماسليحاتىندا.
اگەنتتىك وكىلى ءوز ءسوزىن ناقتى مىسالدارمەن كەلتىردى.
«ماسەلەن ساتپايەۆ قالاسى اكىمى وتستاۆكاعا ءوتىنىش بەردى. ونىڭ تىكەلەي قىزمەتكەرى جەمقورلىق جاساعان. بۇل قىلمىس 10 جەلتوقساندا جاسالعانىنا قاراماستان مورالدىق- ەتيكالىق قاعيداتتاردى نەگىزگە الا وتىرىپ، ساتپايەۆتىڭ اكىمى وتستاۆكاعا كەتۋدى ءوتىندى. ازىرگە وتستاۆكا قابىلدانعان جوق. ول تارتىپتىك جاۋاپكەرشىلىككە تارتىلدى»، - دەدى ول.
ايگۇل بازاربايەۆا، سونىمەن قاتار، باتىس قازاقستان وبلىسىندا دا وسىنداي جاعداي تىركەلگەنىن جەتكىزدى.
«قازىر سىبايلاس جەمقورلىققا قارسى ءىس- قيمىل اگەنتتىگىنىڭ وندىرىسىندە وسى جاعدايلارعا قاتىستى بىرنەشە سوتقا دەيىنگى تەرگەۋ امالدارى جۇرگىزىلىپ، كەيبىر ءىس سوتتا دا قارالۋدا. وسى ىستەر بويىنشا 11 باسشى جاۋاپكەرشىلىككە تارتىلاتىن بولادى»، - دەدى ول.
اۆتور: ايان بەكەن ۇلى
