08:18, 06 ماۋسىم 2018

اياعىنا 11 رەت اۋىر وتا جاسالعان ويىنشى ۇلكەن فۋتبولعا ورالدى

استانا. قازاقپارات - ەۋروپانىڭ ەكى دۇركىن چەمپيونى، يسپانيالىق سانتي كاسورلا ءبىر جارىم جىلدىق ۇزىلىستەن سوڭ ۇلكەن فۋتبولعا قايتا ورالدى.

ول جاڭا ماۋسىمدا «ۆيلياررەال» كلۋبىندا ونەر كورسەتەدى، دەپ حابارلايدى قازاقپارات ءتىلشىسى كلۋبتىڭ سايتىنا سىلتەمە جاساپ.

33 جاستاعى فۋتبولشى سوڭعى رەت 2016 -جىلعى 19 -قازاندا فۋتبول ويناعان. سوعان قاراماستان «ۆيلياررەال» فۋتبولشىعا تاعى دا سەنىم ارتىپ وتىر. كاسورلا بۇل كوماندانىڭ ساپىندا 2003-2011 -جىلدار ارالىعىندا ونەر كورسەتكەن.

جالپى، فۋتبولشىنىڭ كاسىپقوي مانسابىنا جاراقات كوپ كەدەرگى كەلتىردى. العاش رەت 2013 -جىلى جەنەۆادا چيليگە قارسى وتكەن جولداستىق كەزدەسۋدە يسپانيا ساپىندا الاڭعا شىققان كاسورلا توبىعىنان جاراقات الادى. وكىنىشكە قاراي سول جاراقاتىنان تولىق ايىعا الماي قويادى. لوندوننىڭ «ارسەنال» كلۋبى ساپىندا اياعىنىڭ سىزداپ اۋىرعانىنا قاراماستان جوعارى دەڭگەيدە ويىن كورسەتىپ ءجۇردى. الايدا بىرنەشە جىلدا سول اياق تىزەسىنىڭ ايقىش بايلامىنا، وڭ اياعىنىڭ احيلل سىڭىرىنە بىرنەشە رەت جاسالعان كۇردەلى وتالاردان سوڭ كاسورلا فۋتبولدان ءبىرجولاتا قول ءۇزىپ قالدى.

ۇزاق ۋاقىت تولارساعىنداعى وتا جاسالعان جەر جازىلماعان سوڭ، كاسورلا يسپانياعا، دوكتور ميكەل سانچەسكە باردى. سالامانكا قالاسىندا جۇرگىزىلگەن زەرتتەۋلەر كەزىندە احيلل سىڭىرىنە ينفەكسيا ءتۇسىپ، ءسىڭىردىڭ 8 سانتيمەترىن جەمىرىپ تاستاعانى بەلگىلى بولادى.

ونداي جاراقاتپەن فۋتبول ويناماق تۇگىل، جەر باسىپ ءجۇرۋ مۇمكىن ەمەس ەدى. ابىروي بولعاندا، ءسىڭىرىنىڭ وزىنە 8 رەت كۇردەلى وتا جاساتىپ، بىرنەشە رەت قاتارىنان انتيبيوتيك كۋرستارىن قابىلداۋ ارقىلى ينفەكسيادان دا، جاراقاتىنان دا قۇتىلادى. ال جارانىڭ اشىق قالعان اۋزىن جاماۋ ءۇشىن دەنەنىڭ باسقا جەرىنەن تەرى كەسىپ الىپ جاپسىرۋعا تۋرا كەلەدى. دارىگەرلەر ول تەرىنى فۋتبولشىنىڭ قولىنان - قىزى ينديانىڭ ەسىمى جازىلعان جەرىنەن كەسىپ الادى. بۇل - كاسورلاعا جاسالعان سوڭعى وتا بولدى. Marca باسىلىمىنا بەرگەن سۇحباتىندا سانتي فۋتبولدان ەشقاشان ءۇمىت ۇزبەيتىنىن، بۇل جاراقاتتار جولىن بوگەي المايتىنىن ءمالىم ەتتى.

بىلتىردان بەرى كاسورلا تاعى دا جوعارى دەڭگەيدە دوپ تەبۋ ءۇشىن بارىن سالىپ جاتتىعىپ كەلەدى. جىگەرى مىقتى فۋتبولشى جاتتىعۋلاردىڭ بارىسىن الەۋمەتتىك جەلىدە جانكۇيەرلەرىمەن دە ءبولىسىپ وتىرادى.

سپورتشى بۇگىن تۋيتتەردەگى پاراقشاسىندا «ۆيلياررەال» ساپىندا وتكىزگەن ويىندارىنىڭ ۆيدەوسىنان ۇزىندىلەر جاريالاپ، سول جەتىستىكتەرىن قايتالاۋعا ءۇمىت ارتاتىنىن ءبىلدىردى.