قازاقستاندىق ەسكەك ەسۋشىلەر 11 التىن جەڭىپ الدى
جاسوسپىرىمدەر وليمپياداسىنا جولداما تاراتقان تۋرنيردە قازاقستان سپورتشىلارى ءساتتى ونەر كورسەتتى، دەپ حابارلايدى Olympic.kz.
حالىقارالىق تۋرنيرگە 2000-2001 جانە 2002-2003 -جىلعى جاسوسپىرىمدەر قاتىستى. اتالعان سىندا ەلىمىزدىڭ جاس سپورتشىلارى جالپى ەسەبى 11 التىن، 8 كۇمىس جانە 9 قولا مەدال جەڭىپ الدى. ونىڭ ىشىندە، قازان ايىندا بۋەنوس-ايرەستە وتەتىن جاسوسپىرىمدەر وليمپياداسىنا ءتورت جولداما ۇتىپ العانىمىزدى دا قوسۋ كەرەك.
«سپورتشىلاردىڭ كوپشىلىگى وزدەرىن جاقسى قىرىنان كورسەتە ءبىلدى. اسىرەسە، جاسوسپىرىمدەر وليمپياداسىنا جولداما العان شاكىرتتەرىمىزدى ەرەكشە اتاپ وتكىم كەلەدى. باحريددين دياس كانوەدە جالعىز وتىرىپ جارىسۋدان قولا جۇلدە جەڭىپ السا، ءتورت ادام بولىپ سىنعا تۇسۋدە التىن الدى. ستەللا سۋحانوۆا بايداركادا جالعىز وتىرىپ جارىسۋدا ءۇشىنشى، ەكى ادام بولىپ 500 مەترگە جارىسۋدا ءبىرىنشى ورىن الدى. ستەللانىڭ ەنشىسىندە 3 التىن بار. سونداي-اق، جولداما العاندار قاتارىندا ولگا سۋرمينا دا بار. ەندى جولداما العان سپورتشىلار جاسوسپىرىمدەر وليمپياداسىنا تىڭعىلىقتى دايىندىقتى باستايدى»، - دەيدى اعا باپكەر سەرگەي تيۋنوۆ.
وليمپياداعا جولداما العان سپورتشىلاردان بولەك، الماعامبەت، اكچۋرين، ب. ايتباي سىندى سپورتشىلار وزدەرىن جاقسى قىرىنان كورسەتىپ، ءتۇرلى دارەجەدە مەدال جەڭىپ الدى.
حالىقارالىق تۋرنيرگە جالپى ەسەبى 15 كە جۋىق مەملەكەت قاتىسقان. اعا باپكەردىڭ ايتۋىنشا، قازاقستاندىقتاردىڭ باستى قارسىلاستارى قاتارىندا گەرمانيا، ماجارستان، ۇلى بريتانيا، سلوۆاكيا سپورتشىلارى بولدى.
