قازاقستاندىقتار بۇكىل الەمدىك جازعى پولوني ويىندارىنان 11 مەدال اكەلدى
پولوني ويىندارى دەگەنىمىز - پولشا پرەزيدەنتى اندجەي دۋدانىڭ پاتروناتتىعىمەن كاسىبي ەمەس سپورتشىلاردىڭ اراسىندا وتكىزىلەتىن سايىس. تورۋندا باسەكەنىڭ 25 ءتۇرى بويىنشا 32 مەملەكەت قاتىستى. وعان استانا مەن الماتى قالاسىنان بارعان 17 ادام قازاقستاننىڭ اتىنان باردى.
«قازاقستان ءبىرىنشى رەت بۇكىل الەمدىك پولوني ويىندارىنا قاتىسىپ وتىر. مۇنداي فورماتتاعى سايىس تۋرالى بىرنەشە جىل بۇرىن ەستىگەن ەدىك. 2006-جىلدىڭ اقپان ايىندا ارلامۋۆا قالاسىندا وتكىزىلگەن بۇكىل الەمدىك قىسقى پولوني ويىندارىنا كوماندا اكەلگەن بولاتىنبىز. ول كەزدە 12 ادامنىڭ ىشىنەن ءبىزدىڭ ەلدەگىلەر 9 مەدال ۇتىپ العان. سول كەزدە جازعى جارىستا دا باعىمىزدى سىناپ كورۋگە بەل بايلاپ ەدىك. كەز كەلگەن ادامعا پولونيي ويىندارىنا قاتىسۋعا بولادى. بيىل دەمەۋشى تابىلماعاندىقتان، سايىسقا قاجەتتى قۇرالدار مەن جول اقىسىن قاتىسۋشىلار ءوز قالتاسىنان شىعاردى. ال پولشاداعى شىعىننىڭ ءبارىن ۇيىمداستىرۋشى «ۆسپۋلنوتا پولسكا» كوتەرىپ الدى»، - دەپ حابارلادى «قازاقپارات» ح ا ا تىلشىسىنە قازاقستاندىق كوماندانىڭ كوشباسشىسى، ۇيىمىنىڭ جەتەكشىسى ناتاليا كۋلاكوۆا- زاگوروۆسكايا.
باسەكەدە ەڭ كوپ مەدال العان مەملەكەتتەردىڭ ۇشتىگىن چەحيا، ليتۆا مەن بەلارۋس ەلدەرى قۇراعان. قازاقستان ءوز كەزەگىندە 11 مەدالعا يە بولدى. ءۇش التىن مەدالدى ءجۇزۋ بويىنشا اناتوليي كۋلاكوۆ پەن ەلەنا پوپوۆا، ەرگومەتريادان ماريا كۋلاكوۆا اكەلسە، جالعىز «كۇمىستى» ۆەلوسپورتتان اندرەي كلوچكو قازاقستان قورجىنىنا سالعان.
«العاشقى وندىققا ەنە الماي قالساق تا ەڭسەمىز جوعارى. 2018-جىل وتەتىن قىسقى پولوني ويىندارىنا قاتىسۋدى جوسپارلاپ وتىرمىز. العان اسەرىمىز مول. ويىندار ءسوز جوق، جوعارى دارەجەدە ۇيىمداستىرىلعان. سپورتتىڭ دامۋىن پولشادا ءوز ەلىمىزدەگىدەي تالقىعا سالىپ، سەرىكتەستىك ورناتۋعا قول جەتكىزدىك»، - دەيدى ن. كۋلاكوۆا- زاگوروۆسكايا.
ايتا كەتەرلىگى، بۇكىلالەمدىك پولونيي ويىندارى 1934-جىلدان بەرى ءار ەكى جىل سايىن وتكىزىلىپ كەلە جاتىر. وعان نەگىزىنەن ءار ەلدە ءومىر ءسۇرىپ جاتقان پولياكتار قاتىسادى. شارانىڭ ماقساتى - پولشالىق بىرلەستىكتىڭ ينتەگراتسياسى.
