قازاقستاندا تاعى 11 جولدىڭ قۇرىلىسى باستالادى

ق ر ينۆەستيتسيالار جانە دامۋ مينيسترلىگى اۆتوموبيل جولدارى كوميتەتىنىڭ ءتوراعاسى مەرەكە پىشەمبايەۆتىڭ ايتۋىنشا، ءتورت جولدىڭ قۇرىلىسى بيۋدجەت قارجىسىنا اتقارىلسا، جەتى جوبانى حالىقارالىق بانكتەر قارجىلاندىرادى، دەپ حابارلايدى قازاقپارات ءتىلشىسى.

«اعىمداعى جىلدا ءبىز تاعى ءتورت جولدىڭ قۇرىلىسىن باستايمىز. ولار - بەينەۋ- اقجىگىت، شۋچينسك- زەرەندى، تاسكەسەن- باقتى جانە ءۇشارال- دوستىق. بۇدان بولەك، حالىقارالىق قارجى ينستيتۋتتارىنىڭ قارجىسىنا جەتى جوبانى باستاۋدى جوسپارلاپ وتىرمىز. زاەمنىڭ جالپى كولەمى - 1,8 ميلليون دوللار. اتالعان جولداردىڭ جالپى ۇزىندىعى - 1422 شاقىرىم. ماسەلەن، ازيا دامۋ بانكىنىڭ ەسەبىنەن قاندىعاش- ماقات پەن جەتىباي- جاڭاوزەن، دۇنيەجۇزى بانكىنىڭ اقشاسىنا قۇرتى- بۋرىلبايتال، ۇزىناعاش- وتار مەن بالقاش- بۋرىلبايتال، ال يسلام دامۋ بانكىنىڭ قارجىسىنا اقتوبە- قاندىاعاش پەن اتىراۋ- استراحان جولدارىندا ءتيىستى جۇمىستار باستالادى» ، - دەدى پىشەمبايەۆ بۇگىن استانادا وتكەن باسپا ءسوز ءماسليحاتىندا.

كوميتەت باسشىسىنىڭ ايتۋىنشا، اعىمداعى جىلى ورتالىق- وڭتۇستىك، ورتالىق- شىعىس، بەينەۋ- اقتاۋ، اقتوبە- اتىراۋ، قاپشاعاي- تالدىقورعان، استانا- پەتروپاۆلوۆسك پەن ورال- كامەنكا جولدارىنىڭ قۇرىلىسى جالعاسۋدا. ول ءۇشىن 356,2 ميلليارد تەڭگە ءبولىندى. جىلدىڭ اياعىنا دەيىن بارلىعىن قوسقاندا، 600 شاقىرىم جولدىڭ جۇمىستارىن اياقتاۋ جوسپارلانىپ وتىر.

«بەينەۋ- اقتاۋ مەن الماتى- تالدىقورعان تولىعىمەن اياقتالادى» ، - دەپ اتاپ كورسەتتى پىشەمبايەۆ.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى