پاتەر كەزەگىندە 11 جىل تۇرعان كوپ بالالى انا
الايدا 11 جىل بويى باسپاناسىن كەڭەيتەم دەپ كەزەگىن كۇتكەن ول ءوزىنىڭ جۋىردا تىزىمنەن الىنىپ تاستالعانىن ءبىلدى.
شايزات ىدىرىسوۆا كوپبالالى انا رەتىندە بيىل پاتەر الۋىم قاجەت ەدى. ول تۇرعىن ءۇي كەزەگىندە 5-بولىپ تۇرعاندىعىن دالەلدەيتىن عالامتور جەلىسى ارقىلى الىنعان انىقتاماسىن كورسەتتى. ەندى ءوزىنىڭ كەزەكتەن مۇلدەم الىنىپ تاستالعانىنا نارازى.
شايزات ىدىرىسوۆا، كوپ بالالى انا:
- پاتەرىمنىڭ اۋماعىن كەڭەيتۋگە سۇرادىم. مىنا بالالاردىڭ جاعدايىن جاقسارتۋدى كوزدەدىم. ەندى قازىر قيىن. نە ۇلدا، نە قىزدا جۇمىس جوق. ءبارى بىرگە تۇرادى.
ونىڭ وتباسىندا قازىر بارلىعى 10 ادام بار، 26 شارشى مەتر شاعىن پاتەردە تۇرىپ جاتىر. بارىنەن دە بيىل 18 جاسقا تولعان مۇگەدەك بالاسى اناربەككە قيىن. ول تۋا ءبىتتى كوز جانە بۋىن اۋرۋلارىنا شالدىققان.
ون بەسكە جۋىق وپەراتسيا جاسالعان، دەگەنىمەن، اياعىن ارەڭ باسادى. مەكتەپكە بارماي، ءدارىستى ۇيدە الىپ ءجۇر. قازىر ءبىرىڭعاي ۇلتتىق تەستلەۋگە دايىندالۋدا. اناربەكتىڭ اسقاق ارمانى - جوعارى ءبىلىم الىپ، مەديتسينا مامانى بولۋ.
اناربەك يدەنبايەۆ، Ⅲ توپ مۇگەدەگى:
- وپەراتسيا جاسالعان سوڭ، ءجۇرۋىم قيىندادى. تار بولمەدە اعام ەكەۋمىز ۇيىقتايمىز. اياعىم اۋىرادى. ءوزىمنىڭ بولەك بولمەم بولسا دەپ ارماندايمىن.
قالالىق تۇرعىن ءۇي قورىن ەسەپكە الۋ بولىمىندە ءۇي كەزەگىندە تۇرعانداردى قايتا تۇگەندەۋ جۇمىستارى باستالعان. 2012 - جىلدان بەرى زاڭناماعا ەنگىزىلگەن وزگەرىستەرگە ساي جەڭىلدىك الاتىن توپقا ەنگەندەر ءار جىلدا قاجەتتى قۇجاتتاردى جاڭارتىپ تۇرۋى قاجەت. ال ينۆەنتاريزاتسيا جۇمىسىنىڭ ناتيجەسىندە ازىرگە 1400 دەن استام ادامعا پاتەر بەرىلمەيتىنى انىقتالعان.
سوندىقتان وسىلاردىڭ قاتارىندا كەتكەن شايزات ىدىرىسوۆانىڭ اتىندا ەسكى دە بولسا، 2 بولمەلى پاتەرى بولعاندىقتان، وعان ەندى كەڭەيتۋ كەزەگى بۇيىرماي تۇر. الايدا بۇل شەشىمدى سوتقا بەرىپ، شاعىمدانۋىنا تولىق قۇقىعى بار ەكەندىگىن ايتادى جاۋاپتى مەكەمە باسشىلارى.
جانارگۇل دۇيسەكەنوۆا، قالالىق تۇرعىن ءۇي قورىن ەسەپكە الۋ ءبولىمىنىڭ مەڭگەرۋشىسى:
- ىدىرىسوۆا شايزاتتىڭ وتباسىندا مۇگەدەكتەر بار. ولار قازىرگى تاڭدا كامەلەتتىك جاستان شىقتى. سوندىقتان ولار حالىققا قىزمەت كورسەتۋ ورتالىعىنا جولىعىپ، وزدەرى دوكۋمەنتتەرىن، وزىنە تاپسىرۋعا بولادى.
جەرگىلىكتى مامانداردىڭ ايتۋىنشا، ەندى تەك شايزاتتىڭ بالاسى مۇگەدەك رەتىندە پاتەر كەزەگىنە تۇرا الادى. ال ول Ⅲ توپتاعى مۇگەدەك بولعاندىقتان، مۋنيتسيپيالدى تۇرعىن ءۇي كەزەگىنە تۇرا المايدى.
24.kz
