قوستانايدا تۇراتىن 116 جاستاعى اجەي 4 ءتىلدى بىلەدى - فوتو
«نۇر وتان» پارتياسى وبلىستىق فيليالى ءتوراعاسىنىڭ ءبىرىنشى ورىنباسارى جاڭاباي بيسەمبايەۆ پەن وبلىستىق ءماسليحاتتىڭ دەپۋتاتى الما دوشانوۆا 116 جاستاعى مارفۋعا سەلتەتكەنوۆا مەن 109 جاستاعى ناعيما سەرعاليەۆالاردىڭ ۇيلەرىنە بارىپ، ءتول مەرەكەلەرىمەن قۇتتىقتادى.
مارفۋعا سەلتەتكەنوۆا 1902 -جىلى رەسەيدىڭ قورعان وبلىسىندا تۋعان. 12 بالانى ومىرگە اكەلگەن. ەكىنشى دۇنيەجۇزىلىك سوعىس جىلدارى كۇيەۋى مايدان شەبىنە كەتكەن كەزدە ول ءوزى سۇرانىپ، ەڭبەك ارمياسىنا جازىلعان.
«انامىز توبىل وزەنىنىڭ بويىنداعى بالىق اۋلاشىلار قاتارىندا جۇمىس ىستەگەن. سوعىستان كەيىن ۇزاق جىلدار ساۋىنشى بولدى، تىگىنشىلىكتى وتە جاقسى مەڭگەرگەن. ول قازاق، اراب، ورىس جانە تاتار تىلدەرىندە سويلەيدى. سول سياقتى تاتار تىلىندە ءان ايتۋدى جاقسى كورەدى. وسى كەزگە دەيىن قولىنان كىتاپ تۇسپەگەن، قۇران سۇرەلەرىن تىكەلەي كىتاپتان وقيدى، ءبىرازىن جاتقا ايتادى. ونىڭ اناسى مەن اعاسى عاسىر اسقان كىسىلەر. انامىز ۇزاق جاساۋدىڭ قۇپياسى ادامدارمەن سىيلاسا ءبىلىپ، ومىرگە سۇيىسپەنشىلىكپەن قاراۋدا دەپ ايتىپ وتىرادى»، - دەيدى قاريانىڭ قىزى جىبەك قۇرمانوۆا.
ال ناعيما سەرعاليەۆا 1908 -جىلى مەڭدىقارا اۋدانىندا دۇنيەگە كەلگەن. قوستانايعا جاقىندا كوشىپ كەلىپتى.
«انامىز ءومىر بويى قاراپايىم ساۋىنشى بولىپ جۇمىس ىستەدى. قولى قالت ەتكەندە ولەڭ جازاتىن. اۋىلداستارى ونى مەيىرىمدىلىگى، ادامگەرشىلىگى مەن كەمەڭگەرلىگى ءۇشىن سىيلادى. كەزىندە اۋىلدىق، اۋداندىق كەڭەستەردىڭ دەپۋتاتى بولىپ تا سايلاندى. ءتىپتى وبلىس اتىنان ماسكەۋ قالاسىنداعى بۇكىلوداقتىق ەڭبەك وزاتتارى جيىنىنا قاتىستى»، - دەپ اڭگىمەلەيدى قىزى زاۋرە ءمىنايداروۆا.
ناعيما اجە ءقازىر قالامىن قولىنان تاستاماعان. ءالى تىڭ. كەيدە ولەڭ جازادى. ايتپاقشى، ونىڭ ولەڭدەرىنە قوستانايلىق كومپوزيتور قاجىعالي وماروۆ ءان شىعاردى.
«نۇر وتان» پارتياسى وبلىستىق فيليالى عاسىر اسقان قاريالارعا سىي-سياپات كورسەتتى. جالپى، بەلگىلى بولعانداي، بۇگىندە قوستاناي وبلىسىندا جاسى 100 دەن اسقان 22 اجەي بار. ولاردىڭ كوبى وبلىس ورتالىعىنان شالعاي اۋىلداردا تۇرادى.
