ءال- فارابيدىڭ 1150 جىلدىق مەرەيتويىنا وراي دەرەكتى فيلم ءتۇسىرىلدى
كورەرمەنگە «وركەنيەت شىراقشىسى» اتاۋىمەن ۇسىنىلعالى وتىرعان ەكى ءبولىمدى تاريحي- زەرتتەۋ تۋىندىسى 18، 25 - قاڭتار كۇندەرى، ساعات 20:35-تە ەفيرگە شىعادى.
دەرەكتى فيلمنىڭ ءتۇسىرىلىم جۇمىستارى بەس اي كولەمىندە عۇلاما عالىم دۇنيەگە كەلگەن، تاريحتا «زەرنۋك»، «ۆەسيدج» دەگەن اتپەن بەلگىلى وقسىز جەرىنەن باستالىپ، ەجەلگى وتىرار، كاير شاھارلارىندا جالعاستى. سونىمەن قاتار، ءتۇسىرىلىم توبى عۇلاما ومىردەن وتكەن داماسك قالاسىندا بولىپ قايتتى.
كەمەلىنە جەتكەن شاعىندا ءابۋ ناسىر ەلىن تاستاپ، باعدادقا نەگە اتتاندى؟ ۇلى ويشىلعا قاتىستى «وتىرار كىتاپحاناسىنىڭ نەگىزىن قالاعان» دەگەن اڭىز شىندىققا قانشالىقتى جاناسادى؟ نەلىكتەن بارشا وركەنيەتتى الەم وعان «ەكىنشى ۇستاز» دەپ تاعزىم ەتەدى؟ دەرەكتى تۋىندىدا وسى ساۋالدارعا جاۋاپ بەرىلىپ، ءال- فارابي ادامزاتتىڭ اسىل قازىناسى - عىلىم جەتىستىكتەرى مەن ازات ويدىڭ قۇتقارۋشىسى رەتىندە سيپاتتالادى. «ەكىنشى ۇستازدىڭ» اراب ەلدەرىندە جارىق كورگەن ەڭبەكتەرىنىڭ باسىم كوپشىلىگى ساقتالعانىن، ال تۋعان ەلىندەگىلەرى تۇركىستان وركەنيەتىمەن بىرگە جوعالعانى ايتىلادى.
«ءال- فارابي بۇگىنگى قازاق دالاسىنان شىعىپ، بۇكىل اراب ءفالسافاسىنىڭ نەگىزىن قالادى. ءوز زامانىنداعى بارلىق عىلىم مەن ءىلىم تۇرلەرىن جۇيەگە كەلتىردى. ونىڭ ءومىرى تۋرالى دەرەك از، الايدا رۋحاني مۇراسى ۇشان- تەڭىز. ءبىز ونىڭ سۋرەتىن العاشقى ۇلتتىق تەڭگەمىزگە سالدىق، ەسىمىن باستى ۋنيۆەرسيتەتىمىزگە بەردىك. الايدا، ەڭبەكتەرىن ءوز تىلىمىزگە ءالى تولىق اۋدارا الماي وتىرمىز. ونىڭ ۇلتتىق ايامىزعا قايتىپ ورالۋى ءدال وسى مىندەتپەن ولشەنەدى. سەبەبى، ول ەلىنە ورالۋدى ءومىر باقي اڭساپ ءوتتى.
ءبىزدىڭ پارىزىمىز - «پاراسات پاديشاسى» اتانعان ۇلى عالىمنىڭ اتاعىن عانا ەمەس، رۋحاني مۇراسىن، ارمان- مۇراتىن، ىزگىلىك ۇستانىمدارىن تۋعان ەلىنە قايتارىپ، ۇلتتىق رۋحانياتىمىزدىڭ اجىراماس بولشەگىنە اينالدىرۋ»، - دەيدى فيلم اۆتورى، جۋرناليست دارحان ابدىك.
تۋىندىدا عالىمنىڭ زەرتتەۋ ەڭبەكتەرىنە قاتىستى وتىرارتانۋشى بەكجان بەيسەنباي، عالىم، ونەرتانۋ پروفەسسورى تىنىسبەك قوڭىراتباي، «ءال- فارابي» عىلىمي- زەرتتەۋ ورتالىعىنىڭ ديرەكتورى، پروفەسسور جاقىپبەك التايەۆ پىكىر بىلدىرەدى.
