بيىلءابۋ ناسىر ءال- فارابيدىڭ 1150 جىلدىعى اتاپ وتىلەدى
2020 -جىلى مۇراسى الەمدىك وركەنيەتتىڭ باعا جەتپەس بايلىعى بولىپ تابىلاتىن ءابۋ ناسىر ءال- ءفارابيدىڭ 1150 جىلدىق مەرەيتويىن جوعارى ۇيىمداستىرۋشىلىق جانە مازمۇندىق دەڭگەيدە مەرەكەلەۋدى قامتاماسىز ەتۋ ماقساتىندا ۇلى فيلوسوفتىڭ مەرەيتويىن دايىنداۋ جانە وتكىزۋ جونىندەگى مەملەكەتتىك كوميسسيا قۇرىلدى.
ءابۋ ناسىر ءال- فارابيدىڭ 1150 جىلدىق مەرەيتويىن دايىنداۋ جانە وتكىزۋ جونىندەگى جالپى رەسپۋبليكالىق جوسپاردا ءابۋ ناسىر ءال- فارابي مۇراسىن زەرتتەۋگە جانە تۇسىنۋگە باعىتتالعان 50 دەن استام ءىس- شارا قامتىلدى.
ءابۋ ناسىر ءال- فارابي 870 - جىلى بۇگىندە فاراب قالاسىنىڭ (قازىرگى تۇركىستان وبلىسىنداعى وتىرار) ارىس وزەنىنىڭ سىردارياعا بارىپ قۇياتىن ساعاسىنداعى ەلدى مەكەندە دۇنيەگە كەلدى. وتىرار قالاسى IX عاسىردا تاريحي قاتىناستار مەن ساۋدا جولدارىنىڭ تورابىنداعى اسا ءىرى مادەنيەت ورتالىعى بولعان.
ءال- فارابي تۇرىك تايپاسىنىڭ داۋلەتتى ورتاسىنان شىققانى ءمالىم، بۇعان دالەل ونىڭ تولىق اتى جونىندە «تارحان» اتاۋىنىڭ بولۋى. ءال- فارابي - كورنەكتى ويشىل، ءوزىنىڭ زامانداستارىنىڭ اراسىنداعى ەڭ ءىرى عالىم، فيلوسوف جانە شىعىس اريستوتەليزمىنىڭ اسا ءىرى وكىلى. ءوزىنىڭ ءبىلىمى مەن ەڭبەگىنىڭ ارقاسىندا «ەكىنشى ۇستاز» اتاۋىنا يە بولدى. ءال- فارابيدىڭ شىعارماشىلىق مۇراسى وراسان زور (150گە جۋىق فيلوسوفيالىق جانە عىلىمي تراكتاتتار) ، ال ونىڭ اينالىسقان عىلىمي سالالارى ول - فيلوسوفيا مەن لوگيكا، ساياسات پەن ەتيكا، مۋزىكا مەن استرونوميا. عىلىمي ەڭبەكتەرىنىڭ ەڭ ايگىلىسى «قايىرىمدى قالا تۇرعىندارىنىڭ كوزقاراستارى جايلى تراكتات» دەپ اتالادى. ونىڭ اتاقتى «مۋزىكا تۋرالى ۇلكەن تراكتات» اتتى شىعارماسى الەمنىڭ كوپتەگەن تىلدەرىنە اۋدارىلعان.
ءال- فارابي فيلوسوفيا سالاسى بويىنشا گرەك ويشىلى اريستوتەلدىڭ «كاتەگوريالار» ، «مەتافيزيكا» ، «گەرمەنيەۆتيكا» ، «ريتوريكا» ، «پوەتيكا» ، ءبىرىنشى جانە ەكىنشى «اناليتيكا» ، «توپيكا» جانە ت. ب كوپتەگەن ەڭبەكتەرىنە تۇسىنىكتەمەلەر جازدى.
