سەمەيدى دامىتۋ باعدارلاماسىنا تاعى 111 ميلليارد تەڭگە قاجەت – ش ق و اكىمى

8- ماۋسىم - قازاقستاندا اباي وبلىسى قۇرىلاتىن كۇن. جاڭا ءوڭىردىڭ ورتالىعى سەمەي شاھارى بولماق. ش ق و اكىمدىگىندە وتكەن جينالىس بارىسىندا ايماق باسشىسى دانيال احمەتوۆ سەمەيدى دامىتۋ باعدارلاماسى 2019 -جىلدان بەرى ىسكە اسىرىلىپ كەلە جاتقانىن ايتتى.

«بۇل باعدارلاما پرەزيدەنت قاسىم- جومارت توقايەۆتىڭ تاپسىرماسىمەن قۇرىلعان بولاتىن. وعان 260 ميلليارد تەڭگە ءبولىندى. وسى ۋاقىتقا دەيىن جوسپار 40 پايىزعا ورىندالدى. بولاشاق اباي اۋدانىنىڭ ورتالىعى دامي ءتۇسىپ، جاڭا نىساندار بوي كوتەرىپ كەلەدى. ماسەلەن، بۇكىل ازيا كەڭىستىگىندەگى بىرەگەي مەديتسينالىق مەكەمە - راديونۋكليدتىك ورتالىق بوي كوتەردى»، - دەدى ول.

وبلىس اكىمىنىڭ ايتۋىنشا، اتالعان باعدارلامانى ىسكە اسىرۋعا قوسىمشا 111 ميلليارد تەڭگە قاجەت. ءتيىستى جوسپار ازىرلەنگەن.

«جاڭا وبلىستىڭ مەديتسيناسى ەلىمىزدەگى ەڭ ۇزدىكتەردىڭ ءبىرى بولارى ءسوزسىز. ايماقتا مەديتسينا دەڭگەيى جاعىنان اياگوز قالاسىمەن باسەكەگە تۇسە الاتىن اۋدان ورتالىعى جوق. ونداعى 34 دارىگەر شەتەلدە بىلىكتىلىك ارتتىرىپ، كۇردەلى وتالاردى جاساۋدى ۇيرەندى»، - دەدى دانيال احمەتوۆ.

ەستەرىڭىزگە سالا كەتەيىك، وسىعان دەيىن اباي وبلىسىنىڭ ورتالىعى بولاتىن سەمەيدىڭ ينفراقۇرىلىمى جاقساراتىنىن حابارلاعان ەدىك.

اۆتور: تالعاتجان مۇحامەتبەك ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى