ءاليحان بوكەيحان ۇلىنىڭ 111 جىل بۇرىن برازيليادان اكەلىپ ەككەن اعاشى - كەسكىن
بۇل تۋرالى pavlodarnews.kz حابارلايدى.
اتالعان جوبانىڭ جەتەكشىسى عابيت حافيزدىڭ ايتۋىنشا، ساپاردىڭ العاشقى ايالداماسى سەمەي قالاسى بولعان. سەبەبى، مۇندا ءاليحان بوكەيحان ۇلى «الاشوردا» پارتياسىنىڭ نەگىزىن قالاعان.
«قارت سەمەيدەگى ءىس-شارا قازاقتىڭ كورنەكتى جازۋشىسى مۇحتار اۋەزوۆتىڭ ەسكەرتكىشىنە گۇل شوقتارىن قويۋدان باستالىپ، اۋەزوۆ اتىنداعى پەداگوگيكالىق كوللەدجدە كونسەرتتىك باعدارلامامەن جالعاستى. بۇدان كەيىن اۆتوبۋسپەن الماتىعا جول تارتتىق. وڭتۇستىك شاھارداعى «تۇران» ۋنيۆەرسيتەتىندە دە ونەر كورسەتىپ، الماتىلىقتاردىڭ العىسىنا بولەندىك.
ارتىنشا بالقاش كولى ارقىلى ءاليحان اتامىزدىڭ تۋعان جەرى قاراعاندى وبلىسىنىڭ اقتوعاي وڭىرىنە اتتاندىق. جول-جونەكەي اسحانالارعا توقتاپ، حالىقتىڭ وتىنىشىمەن دالادا جوسپاردان تىس ەكى كونسەرت بەردىك»، - دەيدى عابيت حافيز.
ايتا كەتەرلىگى، اقتوعاي ءوڭىرىنىڭ «تالدىبەيىت» دەپ اتالاتىن زيراتىندا ءاليحان بوكەيحان ۇلىنىڭ ءۇش باۋىرى مەن اكە-شەشەسى جەرلەنگەن. جوبا بارىسىندا جاستار مارقۇمداردىڭ زيراتىنا بارىپ، قۇران باعىشتاپ قايتتى.
«بۇل جەردىڭ «تالدىبەيىت» دەپ اتالۋىنىڭ وزىندىك تاريحى بار. 111 جىل بۇرىن ءاليحان اتامىز وسى جەرگە برازيليادان تۇقىمىن الىپ كەلىپ تال ەككەن. قازىردە جايقالىپ تۇرعان الىپ اعاشتى بابامىزدان قالعان تاريحي جادىگەر دەسەك ارتىق ايتپاسپىز. ايدىڭ سوڭىندا اتالعان ساپار جايلى قىسقامەتراجدى فيلم جارىققا شىعادى. ال، جوبانىڭ باستى ماقساتى - ۇلت كوسەمى بولعان ءاليحان بوكەيحان ۇلىنىڭ مەرەيتويىن ەلەۋسىز قالدىرماۋ»، - دەيدى عابيت حافيز.
ەلىمىزدە تۇڭعىش رەت ۇيىمداستىرىلعان «ءاليحان جولى» جوباسىنا 25 پاۆلودارلىق جاس اتسالىستى. ولاردىڭ قۇرامىندا ايتىسكەر اقىندار، ءانشى-كۇيشىلەر، تاريحشىلار مەن بيشىلەر بار.
