الماتىدا ا. جۇبانوۆتىڭ 110 جىلدىعىنا ارنالعان «جۇرەك پەرنەسى» اتتى كورمە اشىلدى - فوتو
كورمەنىڭ اشىلۋ راسىمىنە بەلگىلى مۋزىكا ماماندارى، مادەنيەت جانە ءبىلىم قايراتكەرلەرى، سونداي-اق، ا. جۇبانوۆتىڭ شاكىرتتەرى قاتىستى، دەپ حابارلايدى ق ر مەملەكەتتىك ورتالىق مۋزەيىنىڭ باسپا ءسوز قىزمەتى.
كورمەنىڭ اشىلۋ ءراسىمى بارىسىندا احمەت جۇبانوۆ اتىنداعى رەسپۋبليكالىق مامانداندىرىلعان مۋزىكالىق ورتا مەكتەپ-ينتەرناتى وقۋشىلارى احمەت جۇبانوۆ پەن عازيزا جۇبانوۆانىڭ ءبىرقاتار تانىمال شىعارمالارىن ورىندادى.
ال «جۇرەك پەرنەسى» كورمەسىندە احمەت قۋان ۇلى جۇبانوۆتىڭ ومىرلىك، شىعارماشىلىق، عىلىمي جانە پەداگوگيكالىق جولىن اشىپ كورسەتەتىن ەكسپوزيتسيالار، سونداي-اق جاڭادان باسىلىپ شىققان مۋزىكالىق شىعارمالارى، پارتيتۋرالارى، كىتاپتارى (كونسەرت باعدارلامالارى، حاتتار مەن قولجازبالار) ۇسىنىلدى.
ايتا كەتەلىك، قازاق ك س ر حالىق ءارتىسى، پروفەسسور، ونەرتانۋ عىلىمىنىڭ دوكتورى، قازاقستان عىلىم اكادەمياسىنىڭ اكادەميگى احمەت جۇبانوۆ 1906-جىلى 29- ساۋىردە اقتوبە وبلىسىنىڭ مۇعالجار اۋدانى، قوسۋاقتام قىستاعىندا دۇنيەگە كەلدى. 1929-جىلى لەنينگراد قالاسىنداعى م. گلينكا اتىنداعى مۋزىكا تەحنيكۋمىنىڭ ا. ەتيگوننىڭ سكريپكا كلاسىنا وقۋعا ءتۇستى، كەيىننەن ن. ريمسكي- كورساكوۆ اتىنداعى لەنينگراد مەملەكەتتىك كونسەرۆاتورياسىنا وقۋعا ءتۇسىپ، پروفەسسور ف. نيماننىڭ گوبوي كلاسىندا جانە تاريحي-تەوريالىق فاكۋلتەتىندە ءبىلىم الدى. 1932-جىلى ونەر-زەرتتەۋ اكادەمياسىنىڭ (كەيىن تەاتر، مۋزىكا جانە كينو ينستيتۋتى) مۋزىكا ءبولىمىنىڭ اسپيرانتۋراسىنا ءتۇستى.
احمەت جۇبانوۆ - قازاق مۋزىكا مادەنيەتىنىڭ كوپ قىرلى جانە كورنەكتى قايراتكەرى، قازاقستانداعى كوپتەگەن مۋزىكالىق ونەر وردالارىنىڭ، سونداي-اق تۇڭعىش قازاق مەملەكەتتىك ۇلت اسپاپتار ورەكەسترىنىڭ بەلسەندى ۇيىمداستىرۋشىسى بولدى.
