كاسىبي مەرەكەسى قارساڭىندا پروكۋراتۋرا قىزمەتكەرلەرى استانادا 110 پاتەر يەلەندى
باس پروكۋراتۋرادا وتكەن سالتاناتتى جينالىستا قازاقستان رەسپۋبليكاسىنىڭ باس پروكۋرورى اسحات داۋىلبايەۆ ءسوز سويلەدى.
«تۇرعىن- ءۇي قۇرىلىس جيناق بانكى» جانە «سامۇرىق- قازىنا» قورىنىڭ قاتىسۋىمەن استانا قالاسىندا قونىستانعان پروكۋراتۋرا ورگاندارى قىزمەتكەرلەرىنە ارنالعان كوپ قاباتتى تۇرعىن ءۇي سالىندى. وسى اپتانىڭ باسىندا 110 پاتەردىڭ كىلتى تاپسىرىلدى»، دەدى ول.
جاڭا جىلدىق مەيرامداردى پروكۋراتۋرا قىزمەتكەرلەرىنىڭ وتباسىلارى جاڭا پاتەرلەردە قارسى الادى دەپ كۇتىلۋدە. سونىمەن قاتار «قولجەتىمدى باسپانا-2020» مەملەكەتتىك باعدارلاماسى اياسىندا الماتى، وڭتۇستىك قازاقستان جانە شىعىس قازاقستان وبلىستارىندا 3 كوپقاباتتى تۇرعىن ءۇيدىڭ قۇرىلىسى اياقتالۋعا جاقىندادى.
باس پروكۋروردىڭ ايتۋىنشا، قاداعالاۋ پراكتيكاسىن ەسكەرە وتىرىپ، مەملەكەتتىك باسقارۋ جۇيەسىن، پروكۋراتۋرا ورگاندارىن قوسا العانداعى سوت تورەلىگىن رەفورمالاۋ، سونداي-اق زاڭدىلىقتىڭ ۇستەمدىگى قاعيدالارىن قامتاماسىز ەتۋ بويىنشا ۇسىنىستار ازىرلەندى جانە ولاردى جاڭعىرتۋ جونىندەگى ۇلتتىق كوميسسيا قولدادى.
جىل باسىنان بەرى ەلىمىزدىڭ قۇقىق قورعاۋ جۇيەسىنىڭ قىلمىستىق جانە اكىمشىلىك زاڭنامانىڭ جاڭا مودەلى شەڭبەرىندە جۇمىس ىستەپ كەلە جاتقانى اتاپ ءوتىلدى.
سوتقا دەيىنگى تەرگەۋدىڭ ءبىرىڭعاي ءتىزىلىمى جاڭادان قۇرىلدى، وندا قىلمىستىق قۇقىق بۇزۋشىلىقتىڭ بەلگىلەرى بار ارىزدار مەن حابارلامالاردىڭ بارلىعى تىركەلەدى.
«پروتسەسسۋالدىق پروكۋرورلار ينستيتۋتى تەرگەۋگە پروكۋرورلىق قاداعالاۋدىڭ تيىمدىلىگىن ارتتىرۋعا جاعداي جاسادى. باتىس جانە ورتالىق ەۋروپا ەلدەرىنە ەرەكشە نازار اۋدارا وتىرىپ جۇرگىزىلگەن حالىقارالىق ىنتىماقتاستىق سالاسىنداعى پروكۋراتۋرا ورگاندارىنىڭ جۇمىسى مەملەكەت باسشىسىنىڭ وڭ باعاسىن الدى. تۇتاستاي العاندا كەيىنگى جىلدارى بىزدەر 20 حالىقارالىق كەلىسىمشارت جاساسىپ، قازاقستاننىڭ قۇقىقتىق بازاسىن ساپالىق جانە ساندىق جاعىنان جاقسارتتىق. اقش جانە ۇلىبريتانيامەن جاسالعان قۇقىقتىق كومەك تۋرالى شارتتار قازاقستاننىڭ امەريكاارالىق جانە ەۋروپالىق كونۆەنتسيالارعا قوسىلۋ ءراسىمىن جىلدامداتادى»، - دەدى باس پروكۋرور.
ا. داۋىلبايەۆتىڭ ايتۋىنشا، وسى جىلى پروكۋراتۋرا باستاماسى بويىنشا 2012 -جىلعا دەيىن زەينەتكەرلىككە شىققان ارداگەرلەردىڭ زەينەتاقىلارىن قايتا ەسەپتەۋدىڭ بۇرىننان كەلە جاتقان پروبلەماسىن شەشۋگە مۇمكىندىك تۋدى.
