اقمولا وبلىسىندا قارجى پيراميداسىنان زارداپ شەككەندەرگە 110 ميلليون تەڭگە وتەلدى

القا جۇمىسىنا ق ر باس پروكۋرورىنىڭ ورىنباسارى ج. اسانوۆ، وبلىس اكىمىنىڭ ءبىرىنشى ورىنباسارى ك. وتاروۆ، وبلىس پروكۋرورى جانىنداعى زاڭدىلىقتى قامتاماسىز ەتۋ بويىنشا قوعامدىق كەڭەستىڭ مۇشەلەرى - وبلىستىق ءماسليحات دەپۋتاتى س. ەلۋبايەۆ، وبلىستىق «لۋچ نادەجدى» ق ۇ ك ءتورايىمى ل. رۋبەجانسكايا، قالالىق جانە اۋداندىق پروكۋرورلار قاتىستى.

اقمولا وبلىسىنىڭ پروكۋراتۋراسىنىڭ پروكۋرورى مۇراتبەك يسادىلوۆتىڭ ايتۋىنشا، 2014-جىلى الەۋمەتتىك-ەكونوميكالىق سالادا 1388 تەكسەرىس جۇرگىزىلگەن. 24454 ازاماتتىڭ قۇقىقتارى قورعالدى. ونىڭ ىشىندە 3100 استام ازاماتتىڭ قوردالانىپ قالعان 230 ميلليون تەڭگە جالاقىسى قايتارىلدى. سونىمەن قاتار ۋاكىلەتتى ورگاندارمەن بىرلەسىپ كاداسترلىق قۇنى 822,7 ميلليون تەڭگەنىڭ 53173,3 گەكتار 281 جەر تەلىمى مەملەكەتكە قايتارىلىپ الىندى.

وڭىردە سىبايلاس جەمقورلىقپەن كۇرەسۋ باعىتىندا دا ءبىرقاتار جۇمىستار اتقارىلعان. ماسەلەن، 2014-جىلى وبلىستىڭ پروكۋراتۋرا ورگاندارىمەن 37 ادام سىبايلاس جەمقورلىق تارتىپتىك جاۋاپكەرشىلىگىنە تارتىلسا، ونىڭ 24 ءى باسشىلار.

سونداي-اق وڭىردە الاياقتىق ارەكەتتەردە بەلەڭ الىپ تۇر. وسى باعىتتا زارداپ شەككەن ازاماتتاردىڭ قۇقىقتارىن قورعاۋ سالاسىندا وبلىس پروكۋراتۋراسىنىڭ باستاماسىمەن ارنايى توپ قۇرىلدى. وسىنىڭ ارقاسىندا 2 مىڭ ازاماتتىڭ پايداسىنا سوتتالعان ءادىلوۆا مەن مۇقانوۆادان 382 ميلليون ءوندىرىپ الۋ تۋرالى اتقارۋ ءوندىرىسى بويىنشا الەۋمەتتىك شيەلەنىس (قارجى پيراميداسى) شەشىلىپ، 110 ميلليون تەڭگە وتەلدى.

اۆتور: اسلان وسپانوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى