تۇركى تىلدەس ەلدەرگە ورتاق 10 پيلوتتىق انيماتسيالىق جوبا جارىق كورەدى
مادەنيەت جانە سپورت مينيسترلىگىنىڭ مالىمەتىنشە، انيماتسيالىق الماناحقا كىرەتىن ءار تۋىندىنىڭ حرونومەتراجى 5 مينۋتتان اسادى. وندىرىسكە جىبەرىلگەن 10 جوبا ارنايى ۇيىمداستىرىلعان بايقاۋ ناتيجەسىندە ىرىكتەلىپ الىندى.
كونكۋرسقا تۇركىتىلدەس ەلدەردىڭ ۇلى تۇلعالارى، قاسيەتتى جانۋارلارى مەن جەر- سۋ اتاۋلارى، تۇركى تىلدەس ەلدەردىڭ ورتاق مەرەكەلەرى مەن ۇلتتىق ويىن- ساۋىقتارى تۋرالى اڭىزدار نەگىزىندە جازىلعان 26 ستۋديادان 40 ستسەناريي قابىلداندى. اشىق قورعاۋ قورىتىندىسى بويىنشا «ءۇش ارىس»، «شىراق باتىر مەن بۇركىت جايلى اڭىز»، «لەيلا. تۇركى پاتشايىمىنىڭ قۇپياسى»، «اشينا - ءبىرىنشى كوكتۇرىك»، «تۇران»، «التىن كول»، «احمەت»، «قوجاناسىر جانە ۇرى»، «سۋىندار» جانە «جۇماق دەگەنىمىز.. .» اتتى 10 انيماتسيالىق جوبا قولداۋعا يە بولدى.
«وندىرىسكە جىبەرىلگەن پيلوتتىق انيماتسيالىق جوبالار جانر جاعىنان دا، تاقىرىپ بويىنشا دا ءبىر- بىرىنە ۇقسامايدى. ءارقايسىسى وزىندىك ەرەكشەلىگىمەن دارالانادى. بۇل جوبا تۇركى تىلدەس مەملەكەتتەر اراسىنداعى ىنتىماقتاستىقتى نىعايتىپ قانا قويماي، قازاقستاندىق ستۋديالارعا جاڭا نارىقتارعا شىعىپ، كورەرمەن اۋديتورياسىن كەڭەيتۋگە مۇمكىندىك بەرەدى. سونداي- اق بۇل - بولاشاقتا باۋىرلاس ەلدەرمەن بىرلەسكەن انيماتسيالىق جوبالار جاساۋدىڭ العاشقى قادامى»، - دەدى مينيسترلىكتىڭ مادەنيەت كوميتەتى ءتوراعاسىنىڭ مىندەتىن اتقارۋشى كۇمىس سەيىتوۆا.
