مايكروسوفت كومپانياسى 10 مىڭ قىزمەتكەرىن قىسقارتپاق
«ءبىز ۇلكەن وزگەرىستەر كەزەڭىن باستان وتكەرىپ جاتىرمىز جانە كليەنتتەرمەن جانە سەرىكتەستەرمەن كەزدەسكەندە ماعان بىرنەشە نارسە تۇسىنىكتى بولادى. بىرىنشىدەن، ءبىز پاندەميا كەزىندە تۇتىنۋشىلاردىڭ سيفرلىق شىعىندارىن قالاي ارتتىرعانىن كورگەندىكتەن، ەندى ولاردىڭ تسيفرلىق شىعىندارىن وڭتايلاندىرىپ جاتقانىن بايقاپ جاتىرمىز. ءبىز سونداي-اق بارلىق سالالار مەن ايماقتارداعى ۇيىمداردىڭ ساقتىق تانىتىپ جاتقانىن كورىپ وتىرمىز، ويتكەنى الەمنىڭ كەيبىر بولىكتەرى رەتسەسسيانى وتكەرىپ جاتىر، ال باسقالارى ونى كۇتىپ وتىر. سونىمەن قاتار، جاساندى ينتەللەكت جەتىستىكتەرىنىڭ ارقاسىندا ەسەپتەۋدىڭ كەلەسى ۇلكەن تولقىنى پايدا بولدى، ويتكەنى ءبىز الەمدەگى ەڭ وزىق مودەلدەردى جاڭا ەسەپتەۋ پلاتفورماسىنا اينالدىرىپ جاتىرمىز»، - دەلىنگەن Microsoft باسشىسىنىڭ ۇندەۋىندە.
ول 2023 -جىلدىڭ ءۇشىنشى توقسانىنىڭ سوڭىنا دەيىن 10000 جۇمىس ورنى قىسقاراتىنىن ايتتى. قىسقارتۋ كومپانيا قىزمەتكەرلەرىنىڭ %5 ىن قۇرايدى. ساتيا نادەللا جۇمىستان بوساتىلعانداردىڭ بارلىعى وتەماقى جانە ءتۇرلى جەڭىلدىكتەر الادى دەپ ۋادە بەردى. ونىڭ ايتۋىنشا، كومپانيا «جۇمىس ورىندارىنىڭ تىعىزدىعىن ارتتىرۋ» ءۇشىن جاڭا كەڭسەنى جالعا الۋعا جانە جابدىقتى اۋىستىرۋعا، وتەماقىعا 1,2 ميلليارد دوللار جۇمسايدى.
بۇعان دەيىن الەمدىك McDonald's قىزمەتكەرلەرىن جاپپاي قىسقارتاتىنى تۋرالى حابارلاندى.
