درونمەن تۇرمەگە ەسىرتكى كىرگىزبەك بولعاندار 10 جىلعا دەيىن سوتتالۋى مۇمكىن
جوعارى قاۋىپسىزدىكتەگى مەكەمە اۋماعىنىڭ ۇستىنەن ۇشىپ وتكەن درون «سالەمدەمەنى» تاستاپ، يەسىنە قايتا ورالعان. ال، كەزەكشىلىكتە تۇرعان جەدەل ءبولىم قىزمەتكەرلەرى مەن 6506 اسكەري ءبولىمىنىڭ ساربازدارى بۇل جايتتى بىردەن بايقاپ، تىيىم سالىنعان زاتتى دەر كەزىندە قولعا ءتۇسىردى.
شىمكەنت قالاسى جانە تۇركىستان وبلىسى بويىنشا قىلمىستىق- اتقارۋ جۇيەسى دەپارتامەنتىنىڭ قىزمەتكەرلەرى مۇنداي وقيعانىڭ بۇرىن- سوڭدى بولماعانىن ايتادى. درونعا بايلانعان زاتتى «تاستاپ كەتۋدىڭ» جولى شەبەر ويلاستىرىلعان. اپپاراتتى جۇرگىزىپ تۇرعان ادام دروندى ارى- بەرى شايقاعان، سول كەزدە ونىڭ قاناتتارى زات بايلانعان ءجىپتى قيىپ، «سالەمدەمەنى» ءتۇسىرىپ كەتكەن.
«وقيعا ورنىنا شاقىرتىلعان جەدەل- تەرگەۋ توبى ورامانى اشۋ كەزىندە ىشىنەن شىققان وزگەشە ءيسى بار جاسىل ءتۇستى زاتتى سول ارادا ساراپتاماعا جىبەردى. جەدەل توپ قىزمەتكەرلەرى درون وپەراتورىنىڭ كولىگىن بايقاپ، ورتالىق باقىلاۋ باسقارماسىنىڭ كامەرالارى ارقىلى ىزىنە ءتۇستى. ناتيجەسىندە، وپەراتور مەن جۇرگىزۋشى تۇرعان ۇيدەن ەكى درون مەن وزگە دە زاتتار تاركىلەندى. بۇگىنگى تاڭدا تاپسىرىستى اۋەمەن جەتكىزىپ بەرۋشىلەردىڭ ىسىمەن تەرگەۋشىلەر اينالىسىپ جاتىر. ولار 5 جىلدان 10 جىلعا دەيىن باس بوستاندىعىنان ايىرىلۋى مۇمكىن»، - دەلىنگەن دەپارتامەنتتىڭ باسپا ءسوز قىزمەتى تاراتقان اقپاراتتا.
