يپوتەكا الاردا نە ءبىلۋ كەرەك؟ 10 قادام
1. ءوزىڭىزدىڭ مۇمكىندىگىڭىز نەگە جەتەتىنىنە كوز جەتكىزىڭىز. ءسىز ساتىپ العىڭىز كەلەتىن باسپانا قازاقستاندىق نارىقتا قانشا تۇراتىنىن ءبىلىڭىز. باستاپقى جارنا دا ماڭىزدى. كوپ جاعدايدا باستاپقى جارناسىز يپوتەكا بەرىلمەيدى. كوپتەگەن يپوتەكالىق باعدارلامادا ول 10 پايىزدان باستالادى. ەگەر 30 ميلليوننىڭ ءۇيىن قاراستىرساڭىز 3 ميلليون تەڭگە باستاپقى جارنا بەرۋىڭىز قاجەت بولادى.
يپوتەكا العاننان كەيىن اي سايىنعى تولەيتىن اقشاڭىزدى ءبىلۋ دە ماڭىزدى. بارلىق نەسيەڭىز تابىسىڭىزدىڭ 50 پايىزىنان اسپاۋى قاجەت دەگەن زاڭ بار. ەگەر جالاقىڭىز 400 مىڭ تەڭگە بولسا، سىزگە ەگەر باسقا نەسيەڭىز بولماسا، 200 مىڭ تەڭگەدەن ارتىق يپوتەكا راسىمدەۋگە بولمايدى.
2. بانك ماماندارىنان كەڭەس الۋ. وزىڭىزگە قولايلى شارتتى ءبىلۋ ءۇشىن بىرنەشە بانكتەن كەڭەس الىڭىز. بۇل كەزەڭدە قۇجاتتار ءالى قاجەت ەمەس. بانكتەن مىنا نارسەلەردى انىقتاپ الىڭىز:
قانداي يپوتەكا بار؟
كەپىلدى تۇرعىن ۇيگە قويىلاتىن تالاپتار قانداي؟
بانك قانشا تەڭگە بەرۋگە دايىن؟
باستاپقى جارنا قانشا؟
جىلدىق ءتيىمدى مولشەرلەمەسى قانداي؟
يپوتەكا مەرزىمى قانشا؟
اي سايىنعى تولەمنىڭ شامامەن سوماسى
ارتىق تولەم سوماسى
كەشىكتىرىلگەن ايىپپۇلدار
قارجىلىق قيىندىقتار تۋىنداعان جاعدايدا تولەمدەر كەستەسىن وزگەرتۋ شارتتارى؟
3. وزىڭىزگە قاجەت باسپانانى ىزدەڭىز. يپوتەكانىڭ ءمانى - ساتىپ الىنعان تۇرعىن ءۇي كەپىلگە اينالادى. ال بانك ءۇي كەپىلدە بولسا بەلگىلى ءبىر شارتتار قويا الادى.
قايتالاما نارىقتاعى ءۇيدى الساڭىز، ونىڭ قاشان سالىنعانى ماڭىزدى. ەڭ كوپ دەگەندە 50 جىل بۇرىن سالىنعان ءۇيدى عانا الاسىز. ودان ارتىعىن (60، 70، 80 جىل بۇرىن سالىنعانداردى) الۋعا بولمايدى. سونداي-اق ماتەريالعا قويىلاتىن تالاپتار بار - كىرپىش، مونوليت، پانەل ۇيلەر قاراستىرىلادى.
ەگەر باسپانانى تاڭداساڭىز ساتۋشىمەن مامىلە تۋرالى كەلىسسوزدەر جۇرگىزەسىز، ولاردان تۇرعىن ءۇي قۇجاتتارىنىڭ كوشىرمەلەرىن دايىنداۋدى جانە ساتۋدان تۇسكەن اقشا تۇسەتىن شوت اشۋدى سۇراڭىز.
4. باسپاناعا باعا بەرىلەدى. ول ارنايى ليتسەنزياسى بار ماماندى شاقىراسىز، ول ءوز قىزمەتى ءۇشىن كەمىندە 15 مىڭ تەڭگە الادى. ال ءۇي باعاسى بويىنشا ەسەپتى 1-4 كۇن ارالىعىندا دايىنداپ بەرەدى.
5. بانككە ءوتىنىش بەرەسىز. ول ءۇشىن قاجەت قۇجاتتار:
ءتولقۇجات؛
ساتىپ الىناتىن باسپاناعا قۇقىق بەلگىلەيتىن قۇجاتتار: ساتىپ الۋ-ساتۋ شارتى، سىيعا تارتۋ، مۇراگەرلىك تۋرالى كۋالىك؛
باسپانا باعاسى تۋرالى ەسەپ.
ءوتىنىم بانكتىڭ كرەديتتىك كوميتەتىنىڭ قاراۋىنا شىعارىلادى. يپوتەكا تۋرالى شەشىم قابىلداۋ بىرنەشە كۇننەن بىرنەشە اپتاعا دەيىن سوزىلۋى مۇمكىن.
قانداي جاعدايدا سىزگە يپوتەكا بەرىلمەۋى مۇمكىن؟
نەسيە تاريحىڭىز ناشار بولسا؛
زەينەتاقى جيناعىنىڭ بولماۋى؛
تۇراقتى جۇمىسىڭىز بولماسا.
6. تۇرعىن ءۇيدى ساقتاندىرۋدى راسىمدەڭىز. ءوتىنىم ماقۇلدانعان كەزدە، يپوتەكالىق شارتقا تۇپكىلىكتى قول قويۋ ءۇشىن جىلجىمايتىن مۇلىك، مىسالى، سۋ تاسقىنىنان، ورتتەن ساقتاندىرىلۋى كەرەك. بۇل مىندەتتى كەزەڭ. ءوزىڭىز قالاعان ساقتاندىرۋ كومپانياسىن تاڭدايسىز. باسپانا ءبىر جىلعا دەيىن ساقتاندىرىلادى جانە ودان ءارى سوزىلۋى كەرەك. ونىڭ قۇنى يپوتەكاعا بايلانىستى. مىسالى 30 ميلليون تەڭگەگە يپوتەكا راسىمدەسەڭىز، ءبىرىنشى جىل شامامەن 70 مىڭ تەڭگەگە ساقتاندىرۋىڭىز مۇمكىن.
7. ساتىپ الۋ-ساتۋ شارتىن رەسىمدەڭىز. تۇرعىن ءۇيدى ساتىپ الۋ-ساتۋ شارتى نوتاريۋستا رەسىمدەلۋى كەرەك. وسى كەزدە ءسىز ساتۋشىعا بانكتەن اقشا اۋدارۋعا كەپىلدىك حاتىن بەرەسىز. بۇل حاتتا بانك ساتۋشىعا قۇجاتتى مەملەكەتتىك بازادا تىركەگەننەن كەيىن ساتىپ الۋ-ساتۋ شارتىندا كورسەتىلگەن سومانى تولەيتىنى كورسەتىلگەن.
يپوتەكا كەزىندە ساتىپ الۋ-ساتۋ شارتىن رەسىمدەۋ قۇنى 4 ا ە ك - 12252 تەڭگە. جەڭىلدىكپەن رەسىمدەۋ ءۇشىن بانكتەن يپوتەكالىق قارىز بەرۋ تۋرالى حابارلاما اكەلۋ قاجەت. بۇل سومانى ساتۋشى مەن ساتىپ الۋشى ءداستۇر بويىنشا 50/50 تولەيدى.
8. بانكتە يپوتەكالىق شارتقا قول قوياسىز. يپوتەكالىق شارتتا: مىندەتتەمەنىڭ ءمانى، ونىڭ مولشەرى مەن ورىندالۋ مەرزىمى؛ كەپىلدىڭ مەكەنجايى؛ قارىز الۋشى مەن بانكتىڭ قۇقىقتارى مەن جاۋاپكەرشىلىگى كورسەتىلۋى ءتيىس. قۇجاتپەن مۇقيات تانىسىپ شىعىڭىز.
9. اۋىرتپالىقتى راسىمدەڭىز. تۇسىندىرە كەتەيىك: ەندى ساتىپ الىنعان تۇرعىن ۇيگە اۋىرتپالىق، ياعني كەپىل بەرۋ كەرەك. بۇل دا قارىز الۋشىنىڭ مىندەتى. كەپىل شارتىن نوتاريۋستا نەمەسە بۇگىندە قازاقستاننىڭ كوپتەگەن بانكى جۇمىس ىستەيتىن بلوكچەين تەحنولوگياسىنىڭ كومەگىمەن رەسىمدەۋگە بولادى.
10. مامىلەنى اياقتاڭىز. ساتۋشى ساتىپ الۋ-ساتۋ شارتى تىركەلگەننەن كەيىن 14 كۇن ىشىندە بانكتەن ەسەپ ايىرىسۋدى الادى. ءسىز پاتەردىڭ يەسى بولاسىز، ءبىراق ءسىز كەپىلگە بانكتىڭ رۇقساتىمەن عانا يەلىك ەتە الاسىز.
