سەمەيدە ءبىر-ءبىرىن 10 جىل كورمەگەن اعاسى مەن قارىنداسى قاۋىشتى
وبلىستىق ق ا ج د باسپا ءسوز قىزمەتىنىڭ مالىمەتىنشە، 37 جاستاعى ازامات كىسى ولتىرگەنى ءۇشىن سەمەيدەگى 20№ تۇزەتۋ مەكەمەسىندە جازاسىن وتەپ جاتىر.
ول 16 جىلعا جۋىق ۋاقىتىن تۇرمەدە وتكىزگەن. وسى ۋاقىتقا دەيىن ءوزىن بولاشاقتا نە كۇتىپ تۇرعانىن ءتىپتى ەلەستكەن ەمەس، سەبەبى ونىڭ ءبىر دە ءبىر تۋىسى قالماعان.
تەك تۋعان قارىنداسى ناتاشا عانا بار ەدى.
«سوتتالعان جىگىت قارىنداسىن ۇزاق ىزدەدى. ءبىراق ەش ناتيجە بولمادى. ويتكەنى ونىڭ تەلەفونىن دا، مەكەنجايىن دا بىلمەيتىن. سول كەزدە ەر ادامعا تۇرمە قىزمەتكەرلەرى كومەكتەستى. ناتاشانى تەگى مەن تۋعان جىلى ارقىلى ىزدەپ تاپتى. وسىلايشا، باۋىرى مەن قارىنداسى 10 جىلدان كەيىن قايتا قاۋىشتى»، - دەلىنگەن اقپاراتتا.
كەزىندە اتا-اناسى قايتىس بولعاننان كەيىن ەكەۋى جەتىم قالىپتى. تەك ءبىر-بىرىنە ارقا سۇيەپ عۇمىر كەشكەن. تاعدىر ولاردى 2012-جىلى اجىراتتى.
«2006-جىلى ەر ادام العاش رەت تۇرمەگە قامالعان. 2012-جىلى بوستاندىققا شىعىپ، بىردەن گەرمانياداعى قارىنداسىنا بارادى. قارىنداسىنىڭ قاسىندا بىرنەشە كۇن عانا بولىپ، كەتىپ قالدى. نەبارى 7 اي بوستاندىقتا بولعان ول قايتادان قىلمىس جاساپ، تەمىر تورعا قامالعان. وسىلايشا، باۋىرلار ءبىر-ءبىرىن 10 جىل بويى تاپپاي كەلگەن»، - دەلىنگەن حابارلامادا.
وسى جىلدار بويى ناتاشا اعاسىن قايتا كورەتىنىنە سەنىپ كەلىپتى. ونىڭ ءتىرى ەكەنىن ەستىگەندە، ەش ويلانباستان سەمەيگە كەلدى.
ءبىر-ءبىرىن كورگەندە ەكەۋى دە كوز جاسىنا ەرىك بەردى. ەندى اپكەسى باۋىرى بوستاندىققا شىققاننان كەيىن جاڭا ءومىر باستاۋعا كومەكتەسىپ، بارىنشا قولداۋ كورسەتۋدى ويلاپ وتىر.
«ءبىزدىڭ ءبىر-بىرىمىزدەن باسقا ەشكىمىمىز جوق. سول ءۇشىن ءاردايىم بىرگە بولۋىمىز كەرەك»، - دەيدى ايەل.
ناتاشا ءالى دە گەرمانيادا تۇرادى. كۇيەۋى، ەكى بالاسى بار.
