كانادادا 10 ادامدى پىشاقتاپ ولتىرگەن اعايىندىلاردىڭ بىرەۋىنىڭ دەنەسى تابىلدى
ۆەدومستۆو مالىمەتىنشە، 31 جاستاعى دەميەن ساندەرسوننىڭ ءمايىتى قازا تاپقانداردىڭ كوپشىلىگى تۇرعان كانادالىق كري ۇندىستەرىنىڭ دجەيمس سميت قاۋىمداستىعىنىڭ اۋماعىنان تابىلعان.
كۇدىكتىلەر اعايىندى بولىپ شىقتى. پوليتسيانىڭ حابارلاۋىنشا، مايلز ساندەرسون ءالى بوستاندىقتا ءجۇر، پروۆينتسيانىڭ استاناسى رەدجاينا قالاسىندا ءجۇرۋى مۇمكىن.
ەسكە سالا كەتەيىك، جەكسەنبى كۇنى كانادانىڭ ورتالىق ساسكاچيەۆان پروۆينتسياسىندا بولعان شابۋىلدان كەم دەگەندە 10 ادام قازا تاۋىپ، تاعى 18 ادام پىشاق جاراقاتىن العان.
پوليتسيا كوميسسارىنىڭ كومەكشىسى روندا بلەكمور باسپا ءسوز ءماسليحاتىندا دەميەننىڭ ءمايىتى پوليتسيا ءتىنتۋ جۇرگىزگەن ءۇيدىڭ جانىنداعى قالىڭ ءشوپتى ايماقتا اشىق جەردەن تابىلعانىن ايتتى.
ونىڭ ايتۋىنشا، دەميەننىڭ دەنەسىندە جاراقات ءىزى بولعان.
پوليتسيا ونىڭ اعاسى مايلزدىڭ ءالى قاشىپ جۇرگەنىن ايتىپ، ادامداردى ساق بولۋعا شاقىردى.
مايلز بىرنەشە رەت سوتتالعان جانە جەكە تۇلعا مەن مۇلىككە قارسى قىلمىسى ءۇشىن بىرنەشە رەت جاۋاپقا تارتىلعان.
بۇل وقيعا ساسكاچيەۆان پروۆينتسياسىن ءدۇر سىلكىندىردى، وندا پوليتسيا 13 ءتۇرلى جەردە بولعان شابۋىلداردى تەرگەپ جاتىر.
«ءبىزدىڭ ەلدە مۇنداي جانە باسقا دا زورلىق- زومبىلىققا ورىن جوق»، - دەدى دۇيسەنبىدە كانادا پرەمەر- ءمينيسترى دجاستين تريۋدو.
قۇربان بولعانداردىڭ كوپشىلىگى - 2000-عا جۋىق حالقى بار كانادالىق كري ۇندىستەرى تۇراتىن دجەيمس سميت رەزەرۆاتىنىڭ تۇرعىندارى.
ساسكاچيەۆاندا توتەنشە جاعداي جاريالاندى.
فوتو: bbc.com
اۆتور
اياۋلىم التىنبەك
