ديماشتىڭ بىردەن ءۇش ءانى الەمدىك حيت- پارادتىڭ توپ-10-نا ەندى
ديماش جاقىندا «Okay» اتتى انىنە بەينەكليپ تۇسىرگەنىن جازعان بولاتىنبىز. سوڭعى مالىمەتتەرگە سايكەس، وسى كومپوزيتسيا Billboard’s Hot Trending Songs حيت- پارادىندا 8-ورىندا تۇر. ودان جوعارىراق ديماشتىڭ «Fly Away» ءانى بار، ول 22 اپتا بويى توپ-10 تىزىمىندە. د. قۇدايبەرگەننىڭ «Fly Away» كومپوزيتسياسى العاش رەت Billboard — Hot Trending Songs جاڭا چارتىنا 2021 -جىلدىڭ كۇزىندە قوسىلدى. كەيىن چارتقا «Be with me» اۆتورلىق كومپوزيتسياسى ەنىپ، ول 24 اپتا بويى تىزىمنەن تۇسپەدى.
ال بيىلعى قاڭتاردا قازاقستاندىق ءانشىنىڭ اتالعان قوس ءانى اپتالىق چارتتا رەيتينگىنىڭ ەڭ جوعارعى جولدارىنا - 1 جانە 3-ورىندارعا كوتەرىلدى. Forbes جۋرنالى ديماشتىڭ كومپوزيتسيالارى تۋرالى بىرنەشە رەت جازعان جانە ءارتىستىڭ فوتوسۋرەتتەرىن چارت ناتيجەلەرىنە ارنالعان ماقالالاردا باستى بەتتەرگە ورنالاستىردى.
«ديماش وسى اپتالىق رەيتينگىنىڭ توپ-10-ىنا بىردەن بىرنەشە ترەگىن ورنالاستىرا العان از عانا ارىستەردىڭ ءبىرى سانالادى. ول بۇل ەرلىككە BTS، Blackpink جانە Lisa سىندى الەمگە ايگىلى ەسىمدەرمەن قاتار جەتىپ وتىر»، - دەپ جازادى باسىلىم.
بيىلعى 15-مامىردا World Music Awards رەسمي اككاۋنتى جەكە ورىنداۋشىلار اراسىندا Billboard’s Hot Trending Songs چارتىندا ۇزاق ۋاقىت تۇراتىن ەكى ءاندى اتاپ ءوتتى.
ولار: ديماشتىڭ «Fly Away» ءانى جانە وڭتۇستىك كورەيانىڭ دۇنيەجۇزىنە تانىمال BTS توبىنىڭ مۇشەسى دجيننىڭ «Yours» كومپوزيتسياسى.
