جامبىل وبلىسىنىڭ باس پوليتسەيى 10 جاسار بالانىڭ ارمانىن ورىندادى
بۇل تۋرالى قازاقپارات ءتىلشىسى اتالعان دەپارتامەنتتىڭ باسپا ءسوز قىزمەتىنە سىلتەمە جاساپ حابارلايدى.
«جامبىل وبلىسى پوليتسيا دەپارتامەنتىنىڭ «nstagrami» - داعى پاراقشاسىنا 10 جاسار بالانىڭ اجەسى ۆيكتوريا ميحايلوۆا جازبا قالدىرعان بولاتىن. ول نەمەرەسىنە پوليتسيا دەپارتامەنتىنە ەكسكۋرسيا ۇيىمداستىرعىسى كەلەتىنىن جانە پوليتسيا دەپارتامەنتىنىڭ باستىعى، پوليتسيا گەنەرال- مايورى جانات سۇلەيمەنوۆپەن كەزدەستىرۋدى قالايتىنى جونىندە جازعان. بۇدان بولەك، اجەسى نەمەرەسى كونستانتيننىڭ ۇلگىلى وقۋشى، «اقبوتا» ، «پوني»، «رۋسسكي مەدۆەجونوك»، «كەنگۋرۋ» سەكىلدى زياتكەرلىك كونكۋرستاردىڭ جۇلدەگەرى ەكەنىن، سونداي- اق نەمەرەسىنىڭ ۇدايى پاترۋلدىك پوليتسيا كولىكتەرىن ەرەكشە قىزىعۋشىلىقپەن باقىلاپ وتىراتىنىن دا جەتكىزگەن»، - دەلىنگەن حابارلامادا.
ءوڭىردىڭ باس پوليتسەيى جەتكىنشەكتى قابىلداۋعا قۋانا كەلىسىپ، كەزدەسۋ كۇنىن بەلگىلەپتى. بەلگىلەنگەن كۇنى كونستانتين اجەسىمەن بىرگە پوليتسيا دەپارتامەنتىنە كەلگەن. پوليتسيا گەنەرال- مايورى ج. سۇلەيمەنوۆ بالاقايمەن ءوزىنىڭ جۇمىس كابينەتىندە كەزدەسىپ، ەمەن- جارقىن سۇحبات قۇردى. اڭگىمە بارىسىندا كوستيا ءوزىنىڭ وقۋداعى جەتىستىكتەرى، شاحماتقا اۋەستىگى جانە تاڭداعان بولاشاق ماماندىعى تۋرالى ايتىپ بەرەدى. سونداي- اق، بالاقاي پوليتسەيلەردىڭ جۇمىسى تۋرالى مۇمكىندىگىنشە كوپ بىلگىسى كەلەتىنىن جەتكىزگەن.
ءوز كەزەگىندە جانات سۇلەيمەنوۆ وعان پوليتسيا دەپارتامەنتىنىڭ مۋزەيىندە بولىپ، ىشكى ىستەر ورگاندارىنىڭ قالىپتاسۋ تاريحىمەن تانىسۋدى ۇسىندى. ءتارتىپ ساقشىلارىنىڭ قىم- قۋىت تىرشىلىگىمەن تانىسۋ ءراسىمى تاراز قالاسىنىڭ جەدەل باسقارۋ ورتالىعىندا جالعاسقان. ورتالىقتاعى ەكراننان بۇكىل قالانى كورگەن كوستيا ءوزىنىڭ تاڭدانىسىن جاسىرا المادى.
«كەزدەسۋ سوڭىندا جانات قۋانىش ۇلى كونستانتينگە مىقتى دەنساۋلىق، وقۋدا تابىس جانە ءوز وتباسىن ءاردايىم جەڭىستەرىمەن قۋانتۋدى توقتاتپاۋىن جانە ساتتىلىك تىلەدى. قازاقستان رەسپۋبليكاسى ىشكى ىستەر مينيسترلىگىنىڭ ەمبلەماسى بار قولساعات وبلىستىڭ باس پوليتسەيى سىيعا تارتقان كەزدە كونستانتيننىڭ قۋانىشىندا شەك بولمادى»، - دەيدى پ د باسپا ءسوز قىزمەتىنىڭ جەتەكشىسى گۇلسارا مۇحتارقۇلوۆا.
كەزدەسۋ سوڭىندا بالانىڭ اجەسى ۆيكتوريا ميحايلوۆا پوليتسيا گەنەرال- مايورىنا وسىنداي جىلى قابىلداۋى ءۇشىن العىسىن ءبىلدىرىپ، بۇل جىلى جۇزدەسۋ نەمەرەسىنىڭ جادىندا ۇزاق جىلدار بويى قالاتىنىنا سەنىم ءبىلدىردى.
