تۋريستەر كورۋى ءتيىس قازاقستانداعى 10 جەر اتالدى
«ەلىمىزدىڭ ءاربىر ءوڭىرى تابيعي جانە تاريحي-مادەني مۇراعا اسا باي، ولاردىڭ كوبى قازىرگى تاڭدا دا اسا تانىمال بولىپ وتىرعان جوق. ونىڭ نەگىزگى سەبەپتەرىنىڭ قاتارىندا ءتيىستى ۇسىنىستار مەن ينفراقۇرىلىمنىڭ، اقپاراتتىڭ بولماۋى دا بار. ەلىمىزدىڭ باتىس وڭىرلەرىنىڭ تۇرعىندارى ەلىمىزدىڭ شىعىسىندا نەمەسە وڭتۇستىگىندە نە بارىن بىلمەيدى جانە كەرىسىنشە. ءتىپتى تۋريستىك كومپانيالاردىڭ وكىلدەرىنىڭ ءوزى ەلىمىزدەگى كوپتەگەن قالالار مەن تۋريستىك ورىنداردا بولماعاندارىن مويىندايدى. سوندىقتان وتكەن ايدا ءبىز وتاندىق تۋركومپانيالار ءۇشىن قازاقستان بويىنشا اقپاراتتىق تۋرلارعا باستاما بەردىك. ءبىرىنشى تۋرعا باتىس قازاقستاننىڭ 4 وڭىرىنەن 12 تۋراگەنتتىك پەن وپەراتور قاتىسىپ، نۇر-سۇلتان، بۋراباي، شىمكەنت، سارىاعاش، الماتى، الماتى جانە شىعىس قازاقستان وبلىستارىن ارالاندى. ونىڭ قورىتىندىسى بويىنشا اقپاراتتىق تۋرعا قاتىسقان كەيبىر كومپانيالار ءقازىر سارىاعاش، بۋراباي جانە شىعىس قازاقستان ساناتورييلەرىنە جازعى ماۋسىمعا تۋرلار ساتۋدى باستادى. بۇل تاجىريبە باسقا وڭىرلەردەگى تۋرفيرمالاردىڭ وكىلدەرىنىڭ قاتىسۋىمەن جالعاسىن تابادى»، - دەدى рrimeminister.kz سايتىندا سۇحبات بەرگەن ءو. بيساقايەۆ.
ونىڭاتاپ وتۋىنشە، وتكەن جىلى ۇكىمەت قازاقستان رەسپۋبليكاسىنىڭ تۋريستيفيكاتسيا كارتاسىن ازىرلەدى. وندا رەسپۋبليكالىق ماڭىزى بار توپ-10 نىسان جانە وڭىرلىك ماڭىزى بار توپ-50 نىسان ايقىندالدى. توپ-10 نىسان قاتارىنا نۇر- سۇلتان قالاسى، يمانتاۋ- شالقار، شۋچە- بۋراباي كۋرورتتىق ايماقتارى، باياناۋىل، الاكول كولىنىڭ جاعالاۋى (ش ق و، الماتى)، بالقاش، الماتى ءوڭىرىنىڭ تاۋ كلاستەرى، ماڭعىستاۋ مەن تۇركىستان ەندى. بۇل ايماقتاردىڭ ءتۋريزمدى دامىتۋ تۇرعىسىنان الەۋەتى زور.
«مەملەكەتتىك باعدارلامادا اتالعان ايماقتاردا قاجەتتى ينفراقۇرىلىمدى دامىتۋ قاراستىرىلاتىن بولادى. بۇل ءوز كەزەگىندە تۋريستەردىڭ وندا بولۋى ءۇشىن قولايلى جاعدايلار جاسايدى. بۇل رەتتە، توپ-10 نەمەسە توپ-50 نىسانداردىڭ ءارقايسىسى 100 پايىز زەرتتەلمەگەن. ءتىپتى، تۋريستەر اعىمى قالىپتاسقان باياناۋىل، بالقاش، تۇركىستاندا تەك ءبىرلى- جارىم ادامدار عانا بىلەتىن جەرلەر مەن نىساندار بار. سوندىقتان، مەملەكەتتىك باعدارلاما اياسىندا بۇل نىسانداردى ەل ىشىندە دە، شەتەلدەردە دە ىلگەرلەتۋ بويىنشا جۇمىستار جۇرگىزۋ جوسپارلانعان. ءبىزدىڭ ەلىمىز تۋريستەرگە سان الۋان دەمالىس تۇرلەرىن ۇسىنا الادى. دەمالىس ورىندارىن تۋريزم تۇرىنە قاراي تاڭداۋعا بولادى. ءبىراق مىنا 10 جەردى ءاربىر ادام كورۋى ءتيىس: قايىڭدى، بۋراباي، بوزجىرا، راحمان بۇلاعى، قورعالجىن كولى، اقتاۋ تاۋى، ايگىلى ءانشى قۇمدار، بەلۋحا، شارىن شاتقالى، كولساي جانە يندەر كولدەرى»، - دەدى ول.
