قازاقستان شەكاراسىنداعى 10 وتكىزۋ بەكەتىندە جاڭعىرتۋ جۇمىستارى جۇرگىزىلەدى
بۇل تۋرالى پارلامەنت ءماجىلىسىنىڭ جالپى وتىرىسىندا ق ر پرەمەر-ءمينيسترىنىڭ ورىنباسارى - قارجى ءمينيسترى ءاليحان سمايىلوۆ ءمالىم ەتتى، دەپ حابارلايدى قازاقپارات ءتىلشىسى.
«قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا مەملەكەت باسشىسى قازاقستاننىڭ ەكونوميكاسىن دامىتۋداعى باسىمدىقتاردىڭ ءبىرى - جاڭا ەۋرازيالىق لوگيستيكالىق ينفراقۇرىلىمدى دامىتۋ بولىپ تابىلاتىنىن اتاپ ايتتى. وسىعان بايلانىستى جۇك ترانزيتىنىڭ ەركىندىگىن، كولىك دالىزدەرىن قۇرۋدى جانە جاڭعىرتۋدى قامتاماسىز ەتۋ قاجەت. وسى ماقساتتا ەۋرازيالىق ەكونوميكالىق وداقتىڭ سىرتقى شەكاراسىنداعى قازاقستان ۋچاسكەسىندەگى وتكىزۋ پۋنكتتەرىنىڭ كەدەندىك ينفراقۇرىلىمدارىن دامىتۋ قاجەت. قازىرگى بار ينفراقۇرىلىم ءوسىپ جاتقان اعىندى بىركەلكى جانە جەدەل وتكىزۋگە مۇمكىندىك بەرمەيدى»، - دەدى ۇكىمەت باسشىسىنىڭ ءبىرىنشى ورىنباسارى.
وسى ورايدا ول مىسال رەتىندە قازاقستان-وزبەكستان شەكاراسىندا تۋىنداعان احۋالدى اتاپ ءوتتى. قازاقستان تاراپىنداعى وتكىزۋ بەكەتتەرىنىڭ الدىندا كۇن سايىن تاۋلىگىنە 40 تان 70 كە دەيىن اۆتوكولىك قۇرالدارى جينالىپ قالۋدا، تاسىمالداۋشىلار كەزەكتە 1 تاۋلىككە دەيىن تۇرۋعا ءماجبۇر.
«وتكىزۋ مۇمكىندىگىن ۇلعايتۋ ءۇشىن قارجى مينيسترلىگى «ەتالوندىق وتكىزۋ پۋنكتى» تۇجىرىمداماسىن ازىرلەدى. وسى تۇجىرىمداماعا سايكەس، قازاقستاندىق وتكىزۋ پۋنكتتەرىندەگى قوزعالىس اعىنىن (قوزعالىس باعىتتارى قيىلىسپايتىنداي) مىندەتتى تۇردە اجىراتىپ بولە وتىرىپ، ورنالاستىرۋ جوسپارلانۋدا. كولىك قۇرالدارىنىڭ توقتاۋسىز قوزعالۋى ءۇشىن تەحنيكالىق باقىلاۋدىڭ ءبىرىڭعاي وتپەلى اۆتوماتتاندىرىلعان دالىزدەرى ورناتىلاتىن بولادى»، - دەدى ءا. سمايىلوۆ.
بۇل تۇرعىدا ول 9 اۆتوموبيل جانە 1 تەمىرجول وتكىزۋ بەكەتىنە جاڭعىرتۋ جانە تەحنيكالىق تۇگەل جاراقتاندىرۋ جۇرگىزۋ جوسپارلانىپ وتىرعانىن جەتكىزدى.
«جوبانىڭ ىسكە اسىرىلۋىن وسى جىلدىڭ سوڭىندا باستاۋدى جانە 2022-جىلى اياقتاۋدى جوسپارلاپ وتىرمىز. ە ا ە و سىرتقى شەكاراسىنىڭ بارلىق پەريمەترى بويىنشا وتكىزۋ پۋنكتتەرىن جاڭعىرتۋ، سونداي-اق تاۋارلاردىڭ بارلىق ءوتۋ تسيكلىن اۆتوماتتاندىرۋ، كەدەندىك اكىمشىلەندىرۋ دەڭگەيىن كوتەرۋگە، وتكىزۋ پۋنكتتەرىنىڭ ينفراقۇرىلىمىن جاقسارتۋعا جانە سىبايلاس جەمقورلىق تاۋەكەلدەرىن ازايتۋعا مۇمكىندىك بەرەدى. بۇل سىرتقى ەكونوميكالىق قاتىسۋشىلاردىڭ قارجى شىعىندارىنا جانە ەلدىڭ رەيتينگىسىنە وڭ اسەر ەتەدى»، - دەدى ءاليحان سمايىلوۆ.
