اقتاۋلىق حيرۋرگ 10 مىڭ ناۋقاسقا وتا جاساعان

ول ءوز ەسىمىنىڭ ەلىمىزدەگى 100 ۇزدىكتىڭ قاتارىنا ەنگەنىن ەستىگەندە، تاڭعالىسىن جاسىرا الماپتى. سەبەبى، ءوزىن وزگەلەردەن ارتىق كورمەيدى. ءبىراق، اتاقتى حيرۋرگتىڭ لايىقتى ەڭبەگىن ءوڭىر حالقى جاقسى بىلەدى.

تالعات مۇقانتايەۆتىڭ مەديتسينا سالاسىندا جۇرگەنىنە - 29 جىل. وسى ارالىقتا 10 مىڭعا جۋىق ادامنىڭ ومىرىنە اراشا تۇسكەن. وتا جاساۋدىڭ سوڭعى ۇلگىدەگى بەينەەندوسكوپيالىق ءادىسىن دە مەڭگەرىپ، ءساتتى اتقارىپ ءجۇر.

«ەندوۆيدەوحيرۋرگيا 10 جىل بۇرىن 1-3 پايىز عانا بولاتىن. جاسالمايدى دەسە دە بولادى. بۇگىنگى تاڭدا ونىڭ ۇلەسى 80-90 پايىزعا جەتتى. ياعني، وتانى ادام دەنەسىن كەسپەي، تەك 3-4 جەرىن عانا تەسىپ، جاساي الامىز. بۇل - ۇلكەن جەتىستىك»، - دەيدى تالعات مۇقانتايەۆ.

ىزدەنىمپاز دارىگەر ەسىمى ەندى ەلدەگى 18 ۇزدىك مەديتسينا قىزمەتكەرىنىڭ قاتارىندا. ول ءوزى سياقتى وزگە سالا وكىلدەرىمەن بىرگە ەلباسىمەن كەزدەسىپ قايتتى. مەملەكەت باسشىسىمەن جاھاندىق ۇردىستەرگە بەيىمدەلۋدىڭ الەمدىك تاجىريبەلەرى توڭىرەگىندە پىكىر الماستى.

«پرەزيدەنتپەن ءبىر زالدا وتىرۋدىڭ ءوزى ءبىر عانيبەت! ەنەرگياسى وتە مىقتى. مەديتسينا تۋرالى كەڭەستەرى مەن بولاشاققا جوسپارلارى ءۇمىت بەردى. قازاقستان وسى سالادا ۇزدىكتەردىڭ قاتارىنا ەنسە، الدىمەن بىزدەر قۋانامىز. بىزدەگى مەديتسينا ورتالىقتارى ساپالى قىزمەت اتقارىپ، دارىگەرلەرى الەمدىك ستاندارتقا ساي ەم كورسەتسە دەگەن ارمانىم بار»، - دەيدى تالعات مۇقانتايەۆ.

اكە جولىن جالعاعان تالعات مۇقانتايەۆتىڭ ءىزىن ۇلى ەلامان باسقالى وتىر. ول قازىر مەدۋنيۆەرسيتەت ستۋدەنتى. بۇعان كاسىبي دارىگەر ءدان ريزا. ول دارىگەرلىك ءىستىڭ ۇرپاقتان- ۇرپاققا بەرىلىپ، وتباسىلىق سيپات الۋىن جاقسىلىقتىڭ بەلگىسى سانايدى. وتكەننىڭ تەك ونەگەسىن الىپ، بولاشاققا نىق قادام جاساۋ كەرەكتىگىن ايتادى دارىگەر.

فوتو: 100esim.el.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى