اناسى قىزىنا ۇيرەتەر 10 تاعىلىم
قىز بالانى تاربيەلەۋدىڭ جۇگى بارىنەن اۋىر. ويتكەنى بۇگىنگى تۇلىمشاعى جەلبىرەگەن قىز - ەرتەڭگى اق جاۋلىعى جەلبىرەيتىن انا، اياۋلى جار. انا بولعان سوڭ ول ومىرگە بالا اكەلىپ، ونى ءوسىرۋ ءۇشىن تاعى ءبىر جاۋاپكەرشىلىكتى موينىنا الادى. سوندىقتان ءبىز بۇگىنگى جازبامىزدى قىز ءوسىرىپ وتىرعان بۇگىنگى انالار قاۋىمىنا ارنايمىز.
1. وزىنە- ءوزى قاراي ءبىلۋ كەرەك. اناسى قىزىنا ءار كەز تازا كيىنىپ، شاشىن تاراپ، تازالىق گيگيەناسىن كىشكەنتايىنان ساقتاپ ءجۇرۋدى ۇيرەتۋى ءتيىس. "قىز بالا قاشان دا كورىكتى بولۋ كەرەك" - دەگەن ويدى ساناسىنا سىڭدىرگەن ءجون.
2. ۋاقىتتى باعالاي بىلۋگە ۇيرەتۋ. ۋاقىت - ادام ومىرىندەگى كەرى قايتپايتىن دۇنيە ەكەنىن ەرتە جاستان- اق ۇيرەتكەن ابزال.
3. ەڭ اقىلدى ادامنىڭ ءوزى قاتەلەسەدى. بالاعا اتا- اناسى ەشقاشان قاتەلىك جاسامايتىنداي كورىنۋى مۇمكىن. ايتسە دە قاتەلىكسىز ءومىر بولمايتىنىن ايتۋ ماڭىزدى. ءاربىر قاتەلىك - ومىرلىك ءبىر تاجىريبە.
4. ءوزىڭدى وزگەلەرمەن سالىستىرۋدىڭ ءمانى جوق. ءار ادامنىڭ بويىندا تالانت، ىنتا مەن جىگەر بولادى. سونى شىڭداۋ ماڭىزدى. ءوزىڭدى وزگەلەرمەن سالىستىرا بەرسەڭ، ءوزىڭدى دە جوعالتىپ الاسىڭ. مۇنى وسكەندە دە ايتا ءجۇرۋ ارتىق ەمەس.
5. كەز كەلگەن قيىندىقتان شىعۋعا بولادى. قىز بالا ومىردەگى قيىندىقتاردى تىعىرىق دەپ قاتەلەسۋى مۇمكىن. سوندىقتان كىشكەنتايىنان باستاپ كەز كەلگەن قيىندىق تىعىرىققا تىرەگەنمەن، ودان شىعار جول بارىن ۇيرەتىپ ءوسىرۋ كەرەك.
6. وتىرىك پەن وسەك ايتۋدان الشاق بولۋعا ۇيرەتۋ كەرەك. قىز بالانى كىشكەنتايىنان وتىرىك ايتۋ مەن وسەكتەن الىس ۇستاۋ ماڭىزدى. وتىرىك ايتپاۋ ءۇشىن - قىزىڭىزدى كوپ الداماڭىز. وسەك ايتپاۋ ءۇشىن - ونىڭ الدىندا وزگەنى جامانداماڭىز.
7. جىلاۋ - السىزدىك ەمەس. قىز بالا ءۇشىن جىلاۋ - ىشتەگى شەردى شىعارۋدىڭ ءبىر جولى. كوز جاسىن بۇلاپ، ىشكى كۇيزەلىسىن جەڭەدى. قىز بالالاردىڭ كوڭىلى بوس كەلەدى. كەز كەلگەن دۇنيەگە (سوزگە، كينوعا، ت. ب. ) جىلاپ قالۋى مۇمكىن. سوندىقتان جىلاۋ السىزدىگىڭ ەمەس، ءوزىڭدى ءبىر قايراپ الۋدىڭ جولى دەپ ۇيرەتكەن ءجون.
8. ومىرلىك ماقساتى ايقىن بولسىن. ماقساتقا جەتۋ بار، ارمانداۋ بار. وسىنىڭ ايىرماسىن بويجەتپەي جاتىپ، تۇسىندىرگەن دۇرىس.
9. ومىردە ادىلەتسىزدىك كوپ بولادى. تەك ادىلدىك سالتانات قۇرعان قوعام بولسا، قانداي بولارىن ەلەستەتۋ قيىن. سەبەبى ءومىر - ادىلدىكتىڭ، ادىلەتسىزدىكتىڭ دە مەكەنى.
10. وتكەنگە وكىنۋدىڭ قاجەتى جوق. وتكەن قايتىپ كەلمەيدى. الدا نە بولاتىنىن، قانداي جولعا ءتۇسۋدى ويلاۋ كەرەك. قىز بالاعا جىلدام شەشىم قابىلداۋدى دا ەرتە ۇيرەتۋ كەرەك. قىز بالانىڭ بويجەتىپ قالىپتاسۋى، ونىڭ رۋحاني جاعىنان دامۋى بالا كەزدەن باستاۋ الادى. جاس شىبىق يىلۋگە قانداي يكەم بولسا، بالا دا تاربيەنى قابىلداۋعا سونداي بەيىم.
Massaget.kz
