قۋاندىق بيشىمبايەۆ 10 جىلعا سوتتالدى
قۋاندىق بيشىمبايەۆتىڭ ءىسى بويىنشا سۋديا ءادىلحان شايحيسلاموۆ ۇكىمدى 1 ساعاتتاي ۋاقىت وقىدى. سوت ۇكىمى بويىنشا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ مۇلكىنىڭ تاركىلەنۋىمەن 10 جىلعا سوتتالدى. سونىمەن بىرگە، ول ءومىر بويى مەملەكەتتىك قىزمەتتە جۇمىس ىستەۋ قۇقىعىنان ايىرىلدى.
«بايتەرەك DEVELOPMENT» ا ق بۇرىنعى باسقارما ءتوراعاسى بولعان باقىت جاقسىبايەۆ 4 جىلعا، ال ونىڭ ورىنباسارى بولعان اسلان جاقىپوۆ 2,5 جىلعا سوتتالدى.
سونىمەن قاتار، وسى ىسكە قاتىستى تاعى 19 كۇدىكتىگە قاتىستى سوت ۇكىمى وقىلىپ جاتىر.
ەسكە سالا كەتسەك، بۇدان بۇرىن مەملەكەتتىك ايىپتاۋشى بۇرىنعى ۇلتتىق ەكونوميكا ءمينيسترى قۋاندىق بيشىمبايەۆتى 12 جىلعا باس بوستاندىعىنان ايىرۋدى سۇراعان بولاتىن. جارىس ءسوز كەزىندە پروكۋرور الىبەك ايتجانوۆ ايىپتالۋشىنىڭ مەنشىگىندەگى قىلمىستىق جولمەن الىنعان مۇلىگىن تاركىلەپ، 12 جىل باس بوستاندىعىنان ايىرۋ جازاسىنا كەسۋ تالابىن بىلدىرگەن ەدى. مۇنىمەن قوسا، ق. بيشىمبايەۆقا قاتىستى ءومىر بويى مەملەكەتتىك ورگاندار مەن كوممەرتسيالىق ۇيىمدارداباسشىلىق قىزمەتتەردى اتقارۋىنا رۇقسات ەتىلمەۋى سۇرالعان بولاتىن.
2017-جىلدىڭ 10- قاڭتارىندا سىبايلاس جەمقورلىققا قارسى ۇلتتىق بيۋرو بۇرىنعى ۇلتتىق ەكونوميكا ءمينيسترى قۋاندىق بيشىمبايەۆتىڭ ۇستالعانىن حابارلاعان بولاتىن. ۇلتتىق بيۋرودان ءمالىم ەتكەندەي، ول ءبىرقاتار اداممەن الدىن الا كەلىسىپ، ءىرى كولەمدە بىرنەشە مارتە پارا الدى دەپ ايىپتالعان.
بيشىمبايەۆ قىزىلوردا قالاسىندا اينەك شىعاراتىن جانە وڭدەيتىن زاۋىت سالۋ بارىسىندا «Orda Glass» ج ش س- نىڭ ۆەدومستۆولىق باعىنىستاعى كومپانياسى مەن ونىڭ مەردىگەرلىك ۇيىمى «شىمكەنت حيممونتاج» ج ش س ارقىلى 1 ميلليارد تەڭگە جىمقىرۋ قىلمىستىق سحەماسىن ۇيىمداستىردى دەگەن كۇدىككە ىلىنگەن ەدى.
اۆتور: ايان بەكەن ۇلى
