قاينار ولجايدىڭ جاسوسپىرىمدەرگە ۇسىنعان 10 كىتابى

بۇل ءۇشىن مەكتەپتەگى وقۋلىقتارمەن شەكتەلىپ قالماعان ءجون.

قازىر كەز كەلگەن كىتاپتى دا، كەز كەلگەن فيلمدى دە تاۋىپ الا قويۋعا مۇمكىندىك جەتەرلىك. سول ءۇشىن ەڭبەگى ەلگە سىڭگەن، قازاق قاۋىمىن مويىنداتىپ ۇلگەرگەن قالامگەرلەر مەن كينورەجيسسەرلەردەن ەڭ ۇزدىك تۋىندىلاردى سۇراپ بىلدىك. دەمەك، بۇل كىتاپتار مەن فيلمدەردى كورسەڭىز جامان بولمايسىز...

تانىمال جۋرناليست قاينار ولجاي:

- ءبىرىنشى - م. ماعاۋيننىڭ ەكى تومنان تۇراتىن «مەن» عۇمىربايانى. ءبىرىنشى تومى - «عىلىمنىڭ قيا جولىندا». جىراۋلاردى قالاي تاپقانى، ارحيۆپەن قالاي جۇمىس ىستەگەنى باياندالادى. ەكىنشى تومىندا الەمدىك ادەبيەت قالاي جازىلدى، ءوزىنىڭ شىعارماشىلىق جولىن جازعان. جاسوسپىرىمدەرگە قيىن تۇگى جوق. ماعاۋين تۇسىنىكتى، جەڭىل تىلمەن جازادى. «شاقان شەرىنى» دە وقۋ كەرەك. ەكىنشى - قابدەش ءجۇمادىلوۆتىڭ «تاڭعاجايىپ دۇنيەسى». مۇندا ەكى ءومىر بار. شەكارانىڭ ار جاعىنداعى، قىتايداعى قازاقتاردىڭ ءومىرى مەن بەرگى جاقتاعى ءومىرى. ءتىلى دە وتە كوركەم. ءۇشىنشى - ساپارعالي بەگالين اقساقالدىڭ شىعارماشىلىعى. «قۇس سالۋ» اڭگىمەسى، «ءساتجان» پوۆەسى. ءتورتىنشى - ءسابيت مۇقانوۆتىڭ «قازاق قاۋىمى» دەگەن كىتابى. ءسابيتتىڭ باسقا دۇنيەلەرىنەن ەڭ قىمباتى، وسى - «قازاق قاۋىمى». ىشىندە قازاقتىڭ بۇكىل ەتنوگرافياسى بار.

بەسىنشى - بەردىبەك سوقپاقپايەۆتىڭ ەڭ ۇلكەن كىتابى «بالالىق شاققا ساياحات» پوۆەسى. مۇندا بالانىڭ پسيحولوگياسى بار. «مەنىڭ اتىم - قوجانى» بىلاي دا وقيتىن شىعار. التىنشى - سايىن مۇراتبەكوۆتىڭ «جابايى الماسى». ءسال ەرجەتكەن سوڭ قاليحان ىسقاقتى وقۋ كەرەك. «اقسۋ - جەر ءجانناتىن» وقىپ شىققان ءجون. بۇل - جەتى. سەگىزىنشى - قادىر مىرزا- ءاليدى ەكى ءبولىپ وقۋ كەرەك. قادىردىڭ ەسكەرۋسىز قالعان بالالار پوەزياسى بار. «كۇمىس قوڭىراۋ» دەپ اتالاتىن جيناق. ونى تۇمانباي مولداعاليەۆ كەزىندە «كەيىن « التىن قوڭىراۋ» دەگەن كىتاپ شىقسا دا «كۇمىس قوڭىراۋدان» اسپايدى» دەپ باعالاعان.

دەمەك، جازۋشى بولام دەگەن بالالار بۇل كىتاپتى تولىق وقۋ كەرەك. قادىردىڭ «ءيىرىم» مەن «جازمىش» دەگەن كىتاپتارى بار. توعىزىنشى - «ەتنوگرافپەن اڭگىمە» دەگەن كىتاپ بار. اۆتورى - قاسىمحان بەگمان، ءبىراق ىشىندەگى بارلىق اڭگىمە جاعدا بابالىق اقساقالدىكى. ونىنشى - سەيداحمەت بەردىقۇلوۆتىڭ «اسپاننان شۇعا جاۋعان كۇن» پوۆەسى.

« ۇلان» گازەتى، №46

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى