قوستاناي وبلىسىنا بەس وڭىردەن 10 مىڭ وتباسى كوشىپ بارادى
2017 -جىلى «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ» مەملەكەتتىك باعدارلاماسى اياسىندا وڭتۇستىك وڭىرلەردەن سولتۇستىككە وتباسىلاردى كوشىرۋگە 710 ميلليون تەڭگە قاراستىرىلعان. باعدارلامانىڭ ماقساتى - حالقى تىعىز ورنالاسقان وڭتۇستىكتەن سولتۇستىك ايماققا كوش باسىن بۇرۋ. بۇل جۇمىسسىزدىق پەن كادر تاپشىلىعى ماسەلەسىن قاتار شەشۋگە مۇمكىندىك بەرەدى.
«جوعارىدا اتالعان قارجىعا ماتەريالدىق كومەك رەتىندە ولاردىڭ كوشۋىنە سۋبسيديا بەرىلەدى. ول 35 ايلىق ەسەپتىك كورسەتكىش نەمەسە 79415 تەڭگە. بۇل قارجى ءار وتباسى مۇشەسىنە ەسەپتەلەدى. ەكىنشى كومەك، ولاردىڭ سول جەردەگى ءۇيدى جالعا الۋعا بەرىلەتىن سۋبسيديا. ول 12 اي ىشىندە بەرىلەدى. قارجى كولەمى ءار وتباسى ءۇشىن 34 مىڭنان 68 مىڭ تەڭگە ارالىعىندا بولادى. اقشا تۇرىپ جاتقان ەلدى مەكەنىنە: قالا نەمەسە اۋىلعا ءارى وتباسى مۇشەلەرىنىڭ سانىنا بايلانىستى تولەنەدى»، - دەدى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باس مامانى باقىت ءابىلقايىر قىزى.
قونىس اۋدارۋشىلاردى جۇمىسپەن، باسپانامەن قامتۋدى جۇمىس بەرۋشى تاراپ ءوز موينىنا الادى. جىل اياعىنا دەيىن الماتى، جامبىل، قىزىلوردا، ماڭعىستاۋ جانە وڭتۇستىك قازاقستان وڭىرلەرىنەن ءبىزدىڭ وبلىسقا 30 وتباسى قونىس اۋدارادى دەپ جوسپارلانعان. ولار قوستاناي وبلىسىنىڭ ون ءبىر ەلدى مەكەنىنە تۇراقتايدى. جالپى الداعى بەس جىل ىشىندە استىقتى ولكەگە 10 مىڭ وتباسى كوشىپ كەلەدى.
اۆتور: باتىر جولاي ۇلى
