قازاقستان ەرلى-زايىپتىلار ەڭ كوپ اجىراساتىن دۇنيەجۇزىندەگى 10 ەلدىڭ قاتارىنا كىردى
بۇل، ۇلى بريتانيالىق باسىلىم تاراتقان اقپارات دەپ حابارلايدى 31- ارنا.
تەك وتكەن جىلى ەلىمىزدە 150 مىڭ جۇپ نەكەگە تۇرىپ، سونىڭ ۇشتەن بىرىندەي وتباسىنىڭ ءدام-تۇزى جاراسپاعان.
سوتتا قارالاتىن ازاماتتىق ىستەردىڭ دەنى - نەكە بۇزۋ. تەك بىلتىرعى جىلى ەلىمىزدە 150 مىڭ جاس - وتاۋ كوتەرسە، 53 مىڭ جۇپ اجىراسىپ ۇلگەرگەن. ستاتيستيكا كوميتەتىنىڭ دەرەگىنشە، اجىراسقان وتباسىلار سانى جەتى جىل قاتارىنان ءوسىپ كەلەدى. سەبەپتەرى ءارتۇرلى.
كامەلەتتىك جاسقا تولماي جۇكتى بولىپ، بالاسىن كوشە بويىنا تاستاپ كەتە باراتىن انالار قوعامعا سەلكەۋ تۇسىرەتىنى انىق. قازاقستان مۇسىلماندارى ءدىني باسقارماسى دا وسى ءبىر ماسەلەنىڭ استارىنا ءۇڭىلىپ، قىز بالانىڭ تاربيەسى جايلى اعارتۋشىلىق، ۇگىت-ناسيحات جۇمىستارىنا كىرىسكەن ەكەن.
«بيىل قازاقستان مۇسىلماندار ءدىني باسقارماسىنىڭ ىشىنەن وسى قىزدار ءبولىمىن اشايىق دەگەن ويىمىز بار. سول جەردە ەلىمىزدەگى جاس قىزدارمەن جۇمىس ىستەيتىن ءبىر ءبولىم بولسا، قىز بالالارعا ءتالىم-تاربيە ۇيرەتەتىن ءبولىم بولسا دەگەن نيەتپەنەن اللا جازسا، بولاشاقتا قىزدار ءبولىمىن اشايىن دەپ وتىرمىز»، - دەيدى باس ءمۇفتي ەرجان قاجى مايامەروۆ.
نەكەنىڭ بۇزىلۋىنا ەر كىسىلەر دە سەبەپشى - دەيدى جينالعاندار. جاستىعى باسىلماي، جەلىك قۋعان ازاماتتار وتباسىنىڭ قادىرىن كەش تۇسىنەتىن كورىنەدى. جالپى بىلتىرعى جىلى اجىراسۋ الماتى، قاراعاندى، وڭتۇستىك پەن شىعىس قازاقستان وڭىرلەرىندە ءجيى تىركەلگەن. ماماندار اجىراسىپ جاتقاندار كەيىنگى جىلدارى قايتا قوسىلمايتىن بولعان دەپ وتىر.
