قىتاي جىبەك جولى بويىندا ورنالاسقان ەلدەردىڭ 10 مىڭعا جۋىق پارتيالىق قىزمەتكەرىن شاقىرماق
بۇل تۋرالى «جىبەك جولىنداعى «ازيالىق ساياسي پارتيالار» » ارنايى كونفەرەنسياسىنا قاتىسۋشىلار الدىندا سويلەگەن سوزىندە قىتاي كوممۋنيستىك پارتياسى ورتالىق كوميتەتى ساياسي بيۋروسى تۇراقتى كوميتەتىنىڭ مۇشەسى ليۋ يۋنشان ءمالىم ەتتى.
«قىتاي كومپارتياسى پارتيالىق باسشىلىق جانە مەملەكەتتىك باسقارۋ تاجىريبەسىمەن ءبولىسىپ، الەم ەلدەرىن قىتايدىڭ كونە تاريحى مەن جارقىن مادەنيەتىمەن تانىستىرادى. وسىعان بايلانىستى ءبىز الداعى بەس جىلدا قىتايمەن تانىسۋ ساپارىنا جىبەك جولى بويىندا ورنالاسقان ەلدەردىڭ 10 مىڭعا جۋىق پارتيالىق كادرلارىن شاقىرۋدى شەشتىك»، - دەدى ول.
ەسكە سالا كەتەيىك، «جىبەك جولىنداعى «ازيالىق ساياسي پارتيالار» ارنايى كونفەرەنسياسىنا قاتىسۋ ءۇشىن بەيجىڭگە 31 ەلدىڭ 64 ساياسي بىرلەستىك وكىلدەرى كەلدى. كونفەرەنسيانىڭ جوعارى لاۋازىمدى قوناقتارى - كيپر پرەزيدەنتى، كامبودجا پرەمەر- ءمينيسترى، مالديۆ ۆيتسە- پرەزيدەنتى، لاوس، گرۋزيا، موڭعوليا جانە بانگلادەشتىڭ پارلامەنت سپيكەرلەرى جانە ت. ب.
كونفەرەنسيانىڭ نەگىزگى تاقىرىبى - «جىبەك جولىنا جاڭا كوزقاراس. جالپىعا ورتاق دامۋ ءۇشىن ارەكەت». ونىڭ اياسىندا ءۇش پىكىرتالاس وتكىزىلەدى: «ساياسي ليدەرلىك: ساياسي پارتيالار ءۇشىن جاڭا كونسەنسۋس»، «ادامدار اراسىنداعى بايلانىس: وركەنيەتتەر اراسىنداعى جاڭا ديالوگ» جانە «ەكونوميكالىق ينتەگراتسيا: دامۋدىڭ جاڭا سەرپىنى».
شارا اياسىندا 23 ەلدىڭ شامامەن 50 مەدياقۇرىلىمى وكىلدەرىنىڭ قاتىسۋىمەن «ۇلى جىبەك جولىنىڭ جاڭا تاريحى» مەديافورۋمى ءوتىپ جاتىر. ونىڭ اشىلۋ سالتاناتىندا مەديافورۋمنىڭ قۇرمەتتى قوناعى رەتىندە «قازاقپارات» حالىقارالىق اقپاراتتىق اگەنتتىگىنىڭ باس ديرەكتورى داۋرەن دياروۆ ءبىرىنشى بولىپ ءسوز سويلەدى.
